Wednesday, August 29, 2007

واستراح الجميع

أمى : ايه اللى مدايقك !؟
انا : قلقان .. ومش مستريح .. مش عارف هدخل الجيش ولا هاخد إعفا .. زى خالو.. احمد ابنه لاهو عايش ولا ميت
أمى : ربنا يقدر اللى فيه الخير
-
-
ويمر الوقت بصعوبة إلى ان يأتى اليوم التالى
واذهب إلى منطقة التجنيد .. ثم يأتى دورى فى الكشف الطبى
-
-
عسكرى : ياسر محمد رضا سليم
أنا : نعم
-
-
ادخل غرفة الكشف .. والدكتور يكشف على عيناى لفترة لا تتعدى دقائق .. ولكنها بالنسبة لى ساعات .. الآن سيتحدد هل سأدخل الجيش أو آخذ معفاة .. وماذا لو دخلت الجيش .. وقد رأيت انا ومن معى أسوأ معاملة ونحن ننهى أوراقنا فقط .. فماذا إذا دخلنا الجيش .. كان تعامل العسكر معنا وكأننا العدو أو مجرمين او اننا مواطنين من الدرجة الرابعة .. كل ذلك دار بخواطرى .. إلى ان رأيت الدكتور يكتب على ورقى غير لائق .. أقل من -4 بالعينين .. ورأيتها وكأننى أخذت شهادة ميلاد
-
لم أرى فى مكان أحد يتمنى ان يكون غير لائق إلا فى التجنيد
-
خرجت مسرعاً لأتصل بأمى
-
-
أمى : إيه الأخبار .. عملت إيه ؟
أنا : (بكل فخر) غير لائق
أمى : يعنى ايه ؟
أنا : يعنى اعفاء
أمى : ألف مبروك
أنا : الله يبارك فيكى
أمى : (ببكاء) طيب تعالى بسرعة عشان احمد مات ياياسر
أنا : طيب حاضر .. سلام عليكم
أمى : وعليكم السلام

-

-

تذكرت .. قلقان .. ومش مستريح .. مش عارف هدخل الجيش ولا هاخد إعفا .. زى خالو.. احمد ابنه لاهو عايش ولا ميت
فى نفس الوقت الذى حصلت فيه على الإعفاء فقد خالى فلذة كبده الذى اكمل الشهادة الإبتدائية هذا العام بعد معاناه فى المستشفيات دامت 21 يوماً .. لم يستطع خلالها الصنايعيه (الدكاترة) أن يشخصوا المرض
-
وأتجهت إلى ركن .. لأفتح المصحف وأقرأ سورة الملك .. ويالها من لحظات .. عندما يلهمك الله تدبر آياته .. أهذه سورة الملك التى قرأتها قبل ذلك مرات ومرات .. ألا يتفكر الإنسان فى المعانى الربانية إلا فى الأوقات العصيبة ألا يتأثر الإنسان بوقع الآيات على نفسه إلا فى سويعات معدودة من حياته .. واحسست انى لم اقرأ قرآنا قبل هذا اليوم
وكان ذلك فى تمام الساعة العاشرة صباحاً تقريباً ولكن هيهات ان يتركونا قبل ان ننال شيئاً من الذل والإهانة .. ولم نغادر منطقة التجنيد إلا بعد الساعة الخامسة مساءاً .. وذلك بعدما باءت محاولاتى بالفشل ان اغادر المنطقة واعود لأكمل اوراقى فى اليوم التالى
-
-
ويدفن أحمد وانا فى منطقة التجنيد

Tuesday, August 21, 2007

حياتنا كلمات .. مقبرة التاجات

فجأة لقيت هجوم تاجات من حيث احتسب ومن حيث لا أحتسب .. بس الحمد لله كل اللى بعتولى كان عبارة عن تاج واحد بس جاى من مصادر مختلفة من خليك فى حالك مع انه ما رحلهاش بس هى ادتنى اللينك بتاعه عشان احله جزاها الله خيراً ومن بنت ابيها وده كان أول تعليق ليها هنا فى المدونة بتدينى فيه تاج .. ومن رؤية اللى حطانى أول أسم عشان هاخده يعنى هاخده .. وممكن نعتبرة كمان من ظل قلم مع انى ما زعلتش حد فيهم خالص .. لكن مش عارف هما بيعملوا معايا كده ليه
-
-
اسم مدونتك ؟
من أولها أسئلة خصوصية كده .. انا آسف مش هقدر ارد على السؤال ده
-
-
لماذا اخترته ..وماهي نيتك من وراء اختياره؟
ادخل على أول بوست وانته تعرف .. حياتنا كلمات
-
-
هل فكرت فى إغلاق مدونتك ؟ والسبب ؟
اه .. من اسبوعين كده .. والسبب انى بقيت مشغول جداً وما عنديش وقت اتابع مدونات حد ولا حتى اكتب بوست وحتى لو كتبت بوست ما عنديش وقت ارد على تعليقات المدونين .. والمواضيع دى عايزة وقت كبير .. وبعد مشاورات مع نفسى تراجعت عن انى اغلق المدونة .. بشرط ألا يأخذ منى التدوين ما كان يأخذه منى من الوقت
-
-
صورتك في المدونة ورمزيتها ؟؟
صورتى فى المدونة دى صورتى وانا صغير.. قول للزمان ارجع يا زمان .. حد عنده مانع ؟
-
-
لماذا دخلت عالم التدوين من الاساس؟

انا كنت بتابع المدونات من بعيد قبل ما ادخل .. لحد ما وقعت فى الفخ وعملت مدونة
-
-
التعليقات بالنسبه لك اهميتها؟
كل انسان محتاج آراء الآخرين .. لأنى مش عايش لوحدى فى الدنيا وكمان مش انا اللى احكم على كلماتى .. لازم اعمل لآراء الناس اهمية .. وهى إما تدينى تشجيع و دفعة أو تصحح لى وجهة نظرى .. بس للأسف فى ناس بتكتفى بقراءة العنوان وتدخل تعلق تقول تدوينة جميلة جداً جزاكم الله خيراً جعلها الله فى ميزان حسناتك
-
-
احلى بوست كتبته ...ضع اللينك ؛ ثم اذكر لماذا ؟
فعلاً سؤال صعب .. لأن كل حاجه كتبتها عزيزه عليا جداً .. وبحمد ربنا انه وفقنى اكتبها على المستوى ده
-
-
أفضل بوست قرأته؟ وضع لينكه؟
كان موضوع الدكتورة نور ظل قلم كاتباه اسمه لماذا الإسلام كان مكون من اربع بوستات .. وفى كذا بوست قرأته فى كذا مدونة كان اكثر من ممتاز ..
-
-
أفضل مدونة قرأتها؟

ممكن اقول كل المدونات اللى موجودة على الشمال دى مفضلتى .. وطبعاً فى مدونات كتيرة انا لسه ما توصلتش إليها .. يعنى دول اللى توصلت ليهم .. لكن فى مدونة انا مبهور بيها وبصاحبها وبعتز جداً انى تعرفت على صاحبها وهى مدونة
محمد شمــ(الدين)ـــس
-
-
أسوأ بوست أسوأ مدونة؟
انا كذا مرة وأنا بقلب فى المدونات .. ادخل مدونات أحس انى دخلت هنا غلط .. وفى مرة لقيت نفسى فى مدونة امرأة مثلية .. وبصراحة ما كنتش مركز يعنى ايه مثلية دى .. مش عارف جهل منى ولا ايه .. المهم قريت بوست لحد ما فهمت يعنى ايه .. فأنا احب اوصلها هى وامثالها رساله بسيطة .. اذا بُليتم فاستتروا
-
-
هيحصل ايه لإيميلك لما تموت ؟؟
على وزن الكفن مالهوش جيوب
القبر ما فهوش ما سنجر
-
-
اديت الباسوورد لحد قبل كدا؟
أه .. لواحد كان هيكبرلى حجم الإيميل .. وبعدها واحد فلسطينى سرق إيميلى ورجعهولى .. بعدها غيرت الباسورد وماحدش يعرفه دلوقتى
-
-
كانت إيه طبيعة علاقتك بيه؟

اللى اديته الباسورد ؟ ولا اللى سرق الإيميل ؟ ياريت توضح السؤال شويه
-
-
اسمك؟
ياسر سليم
-
-
المشهور بيه وسط اصحابك؟

هيبقى تامر مثلاً ؟ ياسر سليم برضه
مش هغير أقوالى
-
-
شخصيتك نوعها إيه؟
من النوع المألوف
-
-
عمرك ؟
23
-
-
برجك ؟
برج الفردوس الدور الخامس
برج الجوزاء .. عشان فى ناس بتزعل وبتقول انى ما باخدش التاجات بجدية .. وانا كله إلا التاجات دى .. ممكن اخد اى حاجه هزار .. إلا التاجات باخدها بتهريج
-
-
السفر بالنسبة لك ؟
بحالات .. يعنى لو دولة تانية بيبقى فيها شىء من المتعة .. وبرضه لو محافظة تانيه فى مصر بحبها بحس ان المشوار خفيف على قلبى عكس ما اكون رايح بلد ما بحبهاش زى طنطا مثلا .. من غير ما حد يزعل
-
-
وقت فراغك بتعمل فيه ايه ؟
ايه ده هو فى حاجه اسمها وقت فراغ ؟
طب ياريت ألاقى .. دا انا عايز حد يسلفنى وقت من معاه
-
-
الأكلة المفضلة ؟
المكرونة البشمل .. بس طبعاً مش بتاعة اى حد .. والكبسة السعودى .. والريش الضانى .. ومن كام اسبوع كده جربت بربور البحر لقيته جامد جداً
-
-
الصفات اللي أخدتها من بابا؟
هو الحاج الوالد لما يبقى مبسوط منى وفرحان بيا يقول ياسر دا هو اللى طالعلى .. ومرة كان فى إختلاف فى وجهات النظر كده زى ما بيحصل فى احسن العائلات راح قالى انته طالع لمين ؟
أقول ايه بقه .. طالع فوق لأستاذ محمد جارنا ؟
-
-
الصفات التي أخدتها من ماما ؟
مش عارف .. ممكن ابعتلها تاج وأسئلها ايه الصفات اللى ابنك ياسر خدها منك
-
-
الإنترنت بالنسبة لك ؟
انا دلوقتى احسن من الأول بكتير .. كان فعلاً ممكن يتقال عليا مدمن نت .. دلوقتى الحمد لله اتحسنت كتير وماشى على العلاج
-
-
اكثر ست حجات بتكرها ؟
التاجات
التاجات
التاجات
التاجات
الخيانة
الظلم
-
-
اكثر ست حجات بتحبها ؟
ادون ومايجيليش تاجات
ما ألاقيش فى التعليق تاج جايلى
ما حدش يمررلى تاج
اعيش من غير تاجات
الأمانة
العدل
-
-
الشغل بيمثلك ايه؟
تضييع وقت
-
-
تمرر التاج لمين ؟
حياتنا كلمات .. مقبرة التاجات

Saturday, August 18, 2007

العريان وراء القضبان

الاسم: عصام العريان
الجنسية: مصري
مواليد 28
إبريل1954 بمحافظة الجيزة مركز إمبابة
مسئول المكتب السياسي لجماعة الإخوان المسلمين بمصر
المهنة: طبيب، وأمين عام مساعد نقابة الأطباء المصريين
كان أصغر عضو بمجلس الشعب المصري عام 1987، وهو المجلس الذي تم حله قبل استكمال مدته الدستورية
تم الحكم عليه بالسجن خمس سنوات في محاكمة عسكرية بمصر عام 1995، بسبب انتمائه إلى جماعة الإخوان
حاصل على بكالوريوس الطب والجراحة كلية طب القصر العينى بتقدير جيد جدا. تخصص في أمراض دم والتحاليل الطبية. وماجستير الباتولوجيا الإكلينيكية بتقدير جيد جدا. وسجل لرسالة الدكتوراة في الطب بجامعة القاهرة وأعيقت بسبب الاعتقال. ثم حصل على ليسانس الحقوق جامعة القاهرة وليسانس الآداب قسم التاريخ بجامعة القاهرة 2000 بتقدير جيد جدا. كما أن لديه إجازة في التجويد. ويستعد للحصول على الإجازة العالية في الشريعة الإسلامية من جامعة الأزهر. ويدرس الدكتور العريان دبلوم القانون العام في جامعة القاهرة
وتم إعتقاله مجدداً .. الجمعة
17 - 8 - 2007

وهذه الحملة مشاركة منى وصديقى مصمم الجرافيك عمرو الندرى تضامناً مع الدكتور عصام العريان
ـ
ـ









Wednesday, August 8, 2007

نعمة التغيير




كل منا له ميزات كما أن له عيوب ؛ وهناك جملة متداولة على الألسن يقولون : مافيش حد كامل ؛ وبكل صراحة : لا أتفق تماماً مع هذه الجملة .. وقد أرضى بإحلال ( صعب تلاقي ) محل ( مافيش ) .. إذ أنه يمكن أن يُوجد من هو كامل .. ففي الحديث الصحيح يقول الصادق المصدوق – صلى الله عليه وسلم - كمل من الرجال كثير .. فهناك من العلماء من قال أنه بهذا لم يُغلق الباب على أن يصل إنسان إلى الكمال .. فالطريق متاح لمن أراد .. ولكن هل الوصول إلى درجة الكمال سهل ؟ طبعاً ليس الأمر بهين .. ولكن يحتاج إلى جهد جهيد وإلى صبر ومثابرة ؛ يحتاج إلى إنسان أنعم الله عليه بنعمة التغيير .. ونعمة التغيير التي أقصدها .. هي أن يجاهد الإنسان نفسه على ترك عيوبه وصفاته المذمومة والتخلص منها واستبدالها بصفات محمودة .. وأن يتقبل الإنسان أي انتقاد لذاته لكي يحسن من صفاته ؛ رحم الله سيدي عمر بن الخطاب الذي دعا بالرحمة لمن يهدي إليه عيوبه .. فهناك من لا يتقبل أى انتقاد يوجه إليه ، ويكون به ما به من العيوب ، ولا يفكر يوماً أن يصلح من نفسه .. فلا يصارح نفسه ولا يصالحها .. شخصية لا تتعلم من أخطائها فتغير من أخلاقها بل يترك نفسه للهوى ؛ من يريد أن يصل إلى الكمال يحتاج إلى حصر ما يعرف من عيوبه ثم يسأل المحيطين به والمقريبن منه .. ثم يعالج هذه العيوب ويتخلص منها ؛ من يريد أن يصل إلى الكمال عليه أن يتفقد الصفات الحميدة و أن يلزم النفس على اكتسابها وخير مثال على ذلك ، الإمام أحمد عندما كان يئن في مرض موته ، فلما أخبروه أنه يروى عن طاووس أنه قال : أنين المريض شكوى ، ما أنّ حتى مات .. رحم الله الإمام أحمد كان ممن أنعم الله عليهم بنعمة التغيير وسرعة الاستجابة ؛ من يريد أن يصل إلى الكمال عليه أولاً وأخيراً أن يدعوا الله أن يعينه على ذلك ، وأن ييسر له وأن يجعله ممن يستمعون القول ويتبعون أحسنه .