Tuesday, August 21, 2007

حياتنا كلمات .. مقبرة التاجات

فجأة لقيت هجوم تاجات من حيث احتسب ومن حيث لا أحتسب .. بس الحمد لله كل اللى بعتولى كان عبارة عن تاج واحد بس جاى من مصادر مختلفة من خليك فى حالك مع انه ما رحلهاش بس هى ادتنى اللينك بتاعه عشان احله جزاها الله خيراً ومن بنت ابيها وده كان أول تعليق ليها هنا فى المدونة بتدينى فيه تاج .. ومن رؤية اللى حطانى أول أسم عشان هاخده يعنى هاخده .. وممكن نعتبرة كمان من ظل قلم مع انى ما زعلتش حد فيهم خالص .. لكن مش عارف هما بيعملوا معايا كده ليه
-
-
اسم مدونتك ؟
من أولها أسئلة خصوصية كده .. انا آسف مش هقدر ارد على السؤال ده
-
-
لماذا اخترته ..وماهي نيتك من وراء اختياره؟
ادخل على أول بوست وانته تعرف .. حياتنا كلمات
-
-
هل فكرت فى إغلاق مدونتك ؟ والسبب ؟
اه .. من اسبوعين كده .. والسبب انى بقيت مشغول جداً وما عنديش وقت اتابع مدونات حد ولا حتى اكتب بوست وحتى لو كتبت بوست ما عنديش وقت ارد على تعليقات المدونين .. والمواضيع دى عايزة وقت كبير .. وبعد مشاورات مع نفسى تراجعت عن انى اغلق المدونة .. بشرط ألا يأخذ منى التدوين ما كان يأخذه منى من الوقت
-
-
صورتك في المدونة ورمزيتها ؟؟
صورتى فى المدونة دى صورتى وانا صغير.. قول للزمان ارجع يا زمان .. حد عنده مانع ؟
-
-
لماذا دخلت عالم التدوين من الاساس؟

انا كنت بتابع المدونات من بعيد قبل ما ادخل .. لحد ما وقعت فى الفخ وعملت مدونة
-
-
التعليقات بالنسبه لك اهميتها؟
كل انسان محتاج آراء الآخرين .. لأنى مش عايش لوحدى فى الدنيا وكمان مش انا اللى احكم على كلماتى .. لازم اعمل لآراء الناس اهمية .. وهى إما تدينى تشجيع و دفعة أو تصحح لى وجهة نظرى .. بس للأسف فى ناس بتكتفى بقراءة العنوان وتدخل تعلق تقول تدوينة جميلة جداً جزاكم الله خيراً جعلها الله فى ميزان حسناتك
-
-
احلى بوست كتبته ...ضع اللينك ؛ ثم اذكر لماذا ؟
فعلاً سؤال صعب .. لأن كل حاجه كتبتها عزيزه عليا جداً .. وبحمد ربنا انه وفقنى اكتبها على المستوى ده
-
-
أفضل بوست قرأته؟ وضع لينكه؟
كان موضوع الدكتورة نور ظل قلم كاتباه اسمه لماذا الإسلام كان مكون من اربع بوستات .. وفى كذا بوست قرأته فى كذا مدونة كان اكثر من ممتاز ..
-
-
أفضل مدونة قرأتها؟

ممكن اقول كل المدونات اللى موجودة على الشمال دى مفضلتى .. وطبعاً فى مدونات كتيرة انا لسه ما توصلتش إليها .. يعنى دول اللى توصلت ليهم .. لكن فى مدونة انا مبهور بيها وبصاحبها وبعتز جداً انى تعرفت على صاحبها وهى مدونة
محمد شمــ(الدين)ـــس
-
-
أسوأ بوست أسوأ مدونة؟
انا كذا مرة وأنا بقلب فى المدونات .. ادخل مدونات أحس انى دخلت هنا غلط .. وفى مرة لقيت نفسى فى مدونة امرأة مثلية .. وبصراحة ما كنتش مركز يعنى ايه مثلية دى .. مش عارف جهل منى ولا ايه .. المهم قريت بوست لحد ما فهمت يعنى ايه .. فأنا احب اوصلها هى وامثالها رساله بسيطة .. اذا بُليتم فاستتروا
-
-
هيحصل ايه لإيميلك لما تموت ؟؟
على وزن الكفن مالهوش جيوب
القبر ما فهوش ما سنجر
-
-
اديت الباسوورد لحد قبل كدا؟
أه .. لواحد كان هيكبرلى حجم الإيميل .. وبعدها واحد فلسطينى سرق إيميلى ورجعهولى .. بعدها غيرت الباسورد وماحدش يعرفه دلوقتى
-
-
كانت إيه طبيعة علاقتك بيه؟

اللى اديته الباسورد ؟ ولا اللى سرق الإيميل ؟ ياريت توضح السؤال شويه
-
-
اسمك؟
ياسر سليم
-
-
المشهور بيه وسط اصحابك؟

هيبقى تامر مثلاً ؟ ياسر سليم برضه
مش هغير أقوالى
-
-
شخصيتك نوعها إيه؟
من النوع المألوف
-
-
عمرك ؟
23
-
-
برجك ؟
برج الفردوس الدور الخامس
برج الجوزاء .. عشان فى ناس بتزعل وبتقول انى ما باخدش التاجات بجدية .. وانا كله إلا التاجات دى .. ممكن اخد اى حاجه هزار .. إلا التاجات باخدها بتهريج
-
-
السفر بالنسبة لك ؟
بحالات .. يعنى لو دولة تانية بيبقى فيها شىء من المتعة .. وبرضه لو محافظة تانيه فى مصر بحبها بحس ان المشوار خفيف على قلبى عكس ما اكون رايح بلد ما بحبهاش زى طنطا مثلا .. من غير ما حد يزعل
-
-
وقت فراغك بتعمل فيه ايه ؟
ايه ده هو فى حاجه اسمها وقت فراغ ؟
طب ياريت ألاقى .. دا انا عايز حد يسلفنى وقت من معاه
-
-
الأكلة المفضلة ؟
المكرونة البشمل .. بس طبعاً مش بتاعة اى حد .. والكبسة السعودى .. والريش الضانى .. ومن كام اسبوع كده جربت بربور البحر لقيته جامد جداً
-
-
الصفات اللي أخدتها من بابا؟
هو الحاج الوالد لما يبقى مبسوط منى وفرحان بيا يقول ياسر دا هو اللى طالعلى .. ومرة كان فى إختلاف فى وجهات النظر كده زى ما بيحصل فى احسن العائلات راح قالى انته طالع لمين ؟
أقول ايه بقه .. طالع فوق لأستاذ محمد جارنا ؟
-
-
الصفات التي أخدتها من ماما ؟
مش عارف .. ممكن ابعتلها تاج وأسئلها ايه الصفات اللى ابنك ياسر خدها منك
-
-
الإنترنت بالنسبة لك ؟
انا دلوقتى احسن من الأول بكتير .. كان فعلاً ممكن يتقال عليا مدمن نت .. دلوقتى الحمد لله اتحسنت كتير وماشى على العلاج
-
-
اكثر ست حجات بتكرها ؟
التاجات
التاجات
التاجات
التاجات
الخيانة
الظلم
-
-
اكثر ست حجات بتحبها ؟
ادون ومايجيليش تاجات
ما ألاقيش فى التعليق تاج جايلى
ما حدش يمررلى تاج
اعيش من غير تاجات
الأمانة
العدل
-
-
الشغل بيمثلك ايه؟
تضييع وقت
-
-
تمرر التاج لمين ؟
حياتنا كلمات .. مقبرة التاجات

42 comments:

عمر عاشق القرآن said...

جميلة اوى اجاباتك

وكميلة بشكل عام مدونتك .. تحس فيها بالصدق

انا قريت موضوع "يوم مختلف" لأول مرة دلوقتى .. الموضوع ده حقيقى ؟؟؟؟؟
ربنا سبحانه وتعالى يهدى من يشاء حقا ,,, يارب يهدينا واياكم

جزاكم الله خيرا على الموضوع وعلى المدونة وعلى الناج وعلى انك نجيت الناس من احراج التاجات

radwa said...

حلوة عملية النصب اللى عملتها فى الاجابات على التاج
وخصوصا سؤال اكتر ست حاجات بتكرههاواكتر ست حاجات بتحبها
d:

كنت مقلقه اقع فى فخ التاج
من واقع من حفر حفرة لأخيه

ملحوظه : ماتتخيلش ان حضرتك ممكن تاكل مركونه بشاميل وكبسه وريش كل يوم
يعنى احنا نقف طول اليوم فى المطبخ
عشان اكله تخلص فى دقائق معدوده ؟؟؟

اجابات موفقه ومبهجه
اضحكتنى جدا d:
دمت بود

نسرين - أمة الله said...

السلام عليكم
ههههههههههههههههه
جميله قوى دى
هو الحاج الوالد لما يبقى مبسوط منى وفرحان بيا يقول ياسر دا هو اللى طالعلى .. ومرة كان فى إختلاف فى وجهات النظر كده زى ما بيحصل فى احسن العائلات راح قالى انته طالع لمين ؟
أقول ايه بقه .. طالع فوق لأستاذ محمد جارنا
بس برضه فى حاجات مجاوبتش عليها

ولــــــــــو said...

برضه مش هاغير رأيي
دمك زي العسل
تحياتي وربنا يوفقك

عازف الناى said...

ازيك يا ياسر
لك وحشه
ايه موضوع التاجات ده
انا كنت حاسس انك بتجرى وتصرخ وتقولا
لا للتاجات
فى مظاهره منع التاجات
سلامى
قبل ما امشى
اجابتك كلها ظريفه

عصفور المدينة said...

ماقلتليش بقى مالها طنطا
تاج جميل وسريع
شكرا لك بس رد ع السؤال اللي فوق ده كمل التاج

Sally said...

ياسير
اخيرا عرفت سبب خفة دمك
اصل الجوزاء
اكتر الابراج حبا للمرح
بس انا عايزه اعرف تاريخ ميلادك
من فضلك اقوله يا استاذ مالوف

كل اجباتك جميلة اوي
بتعبر عنك رغم انك قاعد تهزر
بس للصراحة المره دي خدتها بجد شوية
متعملش كدا تاني

وكل الاباء كدا زي باباك
لما يبقوا راضين عنك تبقي فيك منهم
غير كدا ولا يعرفوك

حياتنا كلمات مقبرة التاجات
ياااااااااه
لو كنت ارعف انك بتكره التاجات كدا
كنت بعتلك التاج بردو
هههههههه
خلاص يا ياسير مش هبعتلك تاج تاني

علي فاكرة انا قاصده اكتبلك ياسير
مش ياسير
عشان متكسفنيش ع الهواء تاني

لك احترامي كله
ومعلش تقلنا عليك

بس ايه دا
هو الشغل تضيع وقت
مش غريبه دي

رؤية

Anonymous said...

معنا لازم نشجع الإخوة المدونين كل يوم يمررولك تاج
بما انه درجة الكره عالية
يبقى أسهل طريقة لاستفزازك:D

إجاباتك حلوة وممتعة

نـــــــور said...

:D :D :D

ماصدقتش بجد لما لاقيت حضرتك مجاوب على التاج .. بس ربنا يكرمك اجاباتك فعلا تحس فيها بالصدق زي ما أخونا عمر قال

واعتز جدا لإختيارك سلسلة لماذا الاسلام؟

ونرفع شعار .. لا للتاجات .. تضامنا مع مدونة حياتنا كلمات
:D

دمت بخير وتحياتي


----------------------

وسالي مين قال ان برج الجوزاء مرحين
قولي لهم كدا في البيت عندي طيب
احسن بيقولوا دمي ثقيل
:D

-----------------------

belal said...

:D
:D
ربنا يجعلها آخر التاجات يا أخويا

mazagat said...

بقى بتاكل بربور البحر من ورايا يا ياسر ..!!!!!!!



طيب ماشي


اخر منديل بيني وبينك

قصدي اخر كلام



d:


بوست حلو وموفق

طمني عليك ..
مبقتش اسمع صوتك ليه


... مزاجات

بحب الحرية said...

أضحك الله سنك أخونا

إجابات ظريفة ..

فعلا دي آخر معامله التاج ممكن يتعاملها

:LoL:

Anonymous said...

مقبرة

:D

ربنا يباركلك في وقتك

هاني جابر said...

شارك معنا وانضم الينا في لجنة الدفاع عن سجناء الرأي وحقوق الإنسان
شارك معنا بارسال حدث وتفاصيله لكي نفضح الظالمين ونفضح مهازلهم
انضم إلينا في يالا نفضحهم
www.dahayaa.com

hanoda said...

يا حول الله يارب ده انت متعقد من التاجات خالص
ربنا يفك عقدتك

ياسر سليم said...

السلام عليكم

جميعاً

آسف على تأخرى فى الرد .. لإنشغالى الشديد .. سامحونى

وارجو منكم الدعاء لأخيكم (اللى هو انا ) .. ان اليومين دول يعدوا على خير

تحياتى وخالص تقديرى

ياسر سليم said...

مشروع بطل

منور كأول معلق

ومحتاجك ديما تيجى تنور التعليقات

وبالنسبة لموضوع يوم مختلف ده .. مش حقيقى .. هو مزيج مش قصص حصلت قدامى على بعض الإضافات

واشكرك جداً على كلمات الجميلة والرقيقة ويارب ديماً اكون عند حسن الظن

ياسر سليم said...

Radwa

D:

اى خدمة يا آنسة رضوى

وعشان تعرفى بس انى جدع .. ما ردتلكيش التاج وبعتهولك تانى

وبالنسبة للمكرونة والكبسة والريش .. دى اكلاتى المفضلة .. مش شرط انهم يبقوا مع بعض كلهم فى يوم واحد .. انا مش مفترى قوى للدرجادى .. كل واحده اساساً الواحد لازم يستفرد بيها يوم لوحدها .. يعنى مش هتقفوا طول اليوم فى المطبخ ولا حاجة .. هيبقى فى وقت انكوا تدونوا

.....
ومش عشان الإجابات جميلة بقه تستحلى الموضوع وكل شوية ألاقيكى رايحة مدونة وجايبالى تاج منها

ياسر سليم said...

نسرين - أمة الله


وعليكم السلام ورحمة الله وبركاته

يااااااااااااااه

ايه الغيبة دى

حمدلله على السلامة

وبعدين اكيد التاج مش كله اجبارى .. لازك الواحد يبقى عنده حرية شوية .. مش احسن ما كنتش اجاوب عليه خالص

ياسر سليم said...

ولـــو

وانا كمان مش هغير رأيى

انك انسان محترم

وانا ديماً مقصر معاك فى متابعة مدونتك وبقية المدونات

شكراً لك

وآسف على التقصير

ياسر سليم said...

عازف الناى

انا الحمد لله تمام

الله يخليك .. ان شاء الله ربنا ييسر ونتقابل فى على ارض الواقع

وانا فعلاً موضوع التاجات ده بيعملى كرشة نفس

وشكراً على كلماتك الجميلة

ياسر سليم said...

عصفور المدينة

بس التاج ما فهوش السؤال ده

لأن لو فتحنا فى موضوع طنطا ده

هفتكر كل الذكريات الآليمة

وممكن نعمل لطنطا بوست لوحدها

اوعى تكون منها

ياسر سليم said...

بالله المستعان

ياريت تيجى على خفة الدم يا آنسة سالى .. ده مواليد برج الجوزاء دول بيبقوا فلتات زمانهم

يعنى اللى امه دعياله يطلع من مواليد برج الجوزاء واللى امه داعية عليه يرتبط بحد من مواليد برج الجوزاء

وانا مش عارف كأن التاج كان قصير .. الناس اللى بتعلق بتسألنى اسئله خارج نطاق التاج

عموماً انا مواليد 22 - 5 سنة 84
السنة اللى اتعمل فيها الشلن
عشان يبقى قلت كل حاجة اهوه

وأوعدك انى ما خدتش التاجات بجديه تانى

وبالنسبة للشغل ده محتاج بوست لوحده

ياسر سليم said...

بهاء

ليك وحشة

وصحيح انا كده عرفت المدونين ازاى يقدروا يستفزونى

بس كما تدين تدان

ياسر سليم said...

نـــور

عشان بس الكل يعرف انى بعمل حاجات لا تصدق

مع انى كنت ناوى اعمل نفسى مش واخد بالى من اللى بيبعتولى تاجات .. بس هعمل كده ازاى .. ونفس التاج عمال بيتحدف عليا من كل مكان

وانا اخترت لماذا الإسلام ؟ لأنها تستحق مش بجامل

وياريت نعمل حملة .. لا للتاجات

اما بالنسبة للآنسة سالى فأنا قلتلها اخر المقال فى مواليد برج الجوزاء .. يعنى جبت من الآخر

ياسر سليم said...

بلال

آمـــــــــــــــــين

ياسر سليم said...

مزاجات


مش من وراك انته لوحدك

ده من ورايا انا كمان :)

بس بجد .. بربور البحر ده طلع جامد جداً

واطمن عليا يا باشا

وانته عارف اللخمه اللى الواحد فيها

ياسر سليم said...

بحتحب الحرية

اه .. انا عايز اعرف بقه يعنى ايه اضحك الله سنك دى معناها ايه ؟

ولما حد يقولهالى ارد عليه اقوله ايه ؟

اقوله اضحك الله ضرسك ؟

ارجوا الرد السريع

ياسر سليم said...

منة الله

لأول مره وجودك هنا كمعلقة

لاء .. بس كان فى مرة بتدعونى فيها للمشاركة فى اكتر 10 مدونات تأثيراً

عموماً : منوره وألف مبروك الخطوبة

وربنا يتقبل ويستجيب دعائك

ahmed mefrh said...

مشكور يا عم ياسر
عقبال التاج الكبير
ابو مفراح

ياسر سليم said...

هانى جابر

حاضر

ياسر سليم said...

hanoda

جداً

ما اوصفلكيش

..........
ياريت بلاش ياحول الله يارب دى

الصح : لاحول ولا قوة إلا بالله

ياسر سليم said...

ابو مفراح

اى خدمه ياريس

والتاج الكبير ده امتى ان شاء الله ؟

Sally said...

انا مش هدعيلك في المدونه
انا هدعيلك علي ظهر الغيب

Anonymous said...

اجاباتك بجد حلوه جدا و دمها خفيف

و الحمد لله انى مش من طنطا لحسن شكلك شايل منها اوى :D

FadFadA said...

اجاباتك لذيذة جدا
فعلا اجابة التاجات بتكون صعبة جدا
لأنها عايزة اجابات صادقة
بجد أهنيك على اجاباتك
محمد

radwa said...

ومش عشان الإجابات جميلة بقه تستحلى الموضوع وكل شوية ألاقيكى رايحة مدونة وجايبالى تاج منها

شكل التاج كان عاجبنى
ومالقتش حد غير حضرتك ابعتهوله
هدييييييييييييييه
فى هدية بتترفض؟؟
d:

Mirage said...

enta 3andak 23 sana

wana elly fakrak 45

danta men dorna ya3ny

yasmina said...

ما شاء الله
اجاباتك جميلة جدا

فقطك بالنسبة للعمل اختلف معك
لان بدونه لا طعم للحياة

سلامي

نسرين - أمة الله said...

السلام عليكم
ياسر اخبارك ايه لعل الغيبه سببها خير

Anonymous said...

سورى بس فى مدونه عايوه كل الناس تشوفها

www.ramadan-el-sana-de.blogspot.com

عصفور اسكندرية said...

السلام عليكم
ياسر سليم
كيف الحال
انتا مش فاكرني انا بتاع 7/7/2007
يارب تكون افتكرتني
بجد للدرجه دي بتكره التاجات
وعامل مقبره للتاجات
والقبر مافيهوش ماسنجر
هههههههههههههههههههه
ربنا يوفقك