Thursday, November 1, 2007

معقولة .. انا بدون تانى

السلام عليكم ورحمة الله وبركاته
أولاً : انا مش مصدق انى بكتب فى المدونة تانى .. بجد كنت قربت انسى التدوين وعالم التدوين
ثانياً : احب اشكر وأعتذر جداً لكل من دخل المدونة وسأل عليا وكان قلقان على طول الغيبة واقولهم ما تقلقوش لو حصلى حاجة وحشة ليا اصدقاء كتير متابعين للمدونات وهيعرفوكوا اى خبر مش كويس
ثالثاً : احب اقولكم .. انى أحبكم فى الله
رابعاً : سبب الغيبة دى بدأت كالآتى .. آخر بوست كتبته شرف ما بعده شرف كتبته بطلوع الروح عشان الجهاز كان عليه كمية فيروسات لا حصر لها وكل فيروس له وظيفة مختص بها فى حصارى والتضييق علىَّ ومش كده بس .. كانت سرعة النت .. سرعة ايه ما ينفعش أقول سرعة .. كان بطىء النت يجيب للكبير شلل أطفال .. فأنا قلت هحرق دمى ليه ؟ وانشغلت فى رمضان اللى يومة على ما ناخد بالنا انه بدأ نلاقيه أنتهى .. لحد ما رضيت عن الجهاز وفضيلته إنى اخلى حد يظبطه ويروقه .. وربنا يسامحه روقهولى على الآخر لدرجة انه لما عجز عن مكافحة كل الفيروسات فرمت هارد من الاتنين .. لأنى مشغل الجهاز بهاردين .. وساعات انا بعتبر ان الحجات اللى على الهارد دى ثروة الواحد .. لأن كل حاجه على الهارد إما تعبت فى البحث عنها على النت وتوصلت ليها وتعبت فى انتظار التحميل .. او تعبت لحد ما لقيتها عن واحد صاحبى وخدت الإم بى ثرى بفيروساته ونقلتهاله وانا خدت منه وقت عشان ينقلى وخدت منه وقت تانى عشان يشيل الفيروسات اللى نقلتهاله فالموضوع مش سهل عشان هارد يتفرمت بالسهوله دى وفى الآخر يعتذرلى ويقول انا حاولت معاه وما لقتش حل تانى .. ولما عرفت .. وكأنى أم فقدت ابنها اللى تعبت فى تربيته وكبر على ايديها فى لمح البصر فكما الموت يأتى بغته .. الفرمتة تأتى بغتة .. وبعدما عاد الجهاز للعمل وانتهى رمضان .. بدأ العيد فمر العيد كضيف خفيف .. ولما فكرت انى افتح الجهاز لأول مره بعد العيد تذكرت مصيبتى فى فقد ثروتى فأقفلت الجهاز وغضبت عليه .. ولكن النسيان نعمة عظيمة من الله .. الواحد مش هيعيش طول عمره عايش بحسرته على الهارد .. والهارد اللى ما اتفرمتش ابقى من الهارد اللى اتفرمت .. وقدرت انى اتغلب على احزانى وارجع للتدوين من تانى عشان احكيلكم على المأساه اللى مر بيها جهازى ..
خامساً : ما أوعدكوش انى هكتب بإنتظام .. يعنى ممكن الغيبة تطول .. عشان انا حالياً مش عايش حياه مستقره من ناحية العمل ولسه بظبط أوراقى وبرتب لشكل حياتى فى المرحلة القادمة وكمان الواحد لازم يشوف موضوع الجواز ده بقه .. أظن كفاية كده
سادساً : كل سنة وانتوا طيبين وعساكم من عوادة

38 comments:

عصفور المدينة said...

عوادة فين في العيد الكبير؟
:(
مدا لله على سلامتك وسلامة الجهاز وكل عام وأنت بخير
:)

Unknown said...

حلوة اوى التدوين يأتى بغتة دى هههههههههههه

المهم انك بخير وكل سنة وانت طيب والف سلامة ع الهارد ياسيدى

ربنا يكرمك يوفقك ونسمع عندك كل خير دايما

سلام

دكتور حر said...

حمدالله عالسلامه يا عم ياسر

وألف لا بأس على الجهاز

عودا حميدا
وربنا ينولك اللي في بالك "كله"....يارب

نـــــــور said...

عودا احمدا يا أخي الفاضل .. والحمد لله إن الغيبة كانت خير

والف سلامة ع الجهاز ، وياما الحاجات دي بتحصل في احسن العائلات :)

وربنا يكرم حضرتك في شغلك وحياتك ويعينك إن شا ءالله ...

ومنتظرين ابداعات حضرتك حتى لو كل فترة .. ولك مني كل تحية

radwa said...

عود احمد
حمدالله على السلامه يا بشمهندس
احنا قلنا رجعوا فى كلامهم واخدوك فى التجنيد d:

ولــــــــــو said...

حمد الله على السلامه
انا زعلت جدا على الجهاز - وعلى فكره انا باكره جدا ان حد يقول الكلمه دي على الكومبيوتر انا عندي يقول الحاسب الالي ارحم - اصله كان شكله عليه كنوز بس المهم انك بخير الهاردات بتروح وتيجي
مستنيين جديدك
وان شاء الله ربنا يرزقك ببنت الحلال

semsem said...

كل سنه ونت طيب
وعودا احمد

وربنا يوفقك

محمود الدوح said...

عودا احمد

يارب متنقطعش

فين بقى التدوينات الجديدة

رينـــــــــــا said...

السلام عليكم
عودا حميدا
وكل سنه وانت طيب

ياسر سليم said...

عصفور المدينة

نورت المدونة بعد الغيبه الكبيره اللى انا غبتها

وبالنسبة لعواده انا بصراحه ما عرفوش .. بس عارف ان السعوديين بيقولوا كده .. فقلت اكيد دى مش شتيمه دى حاجه حلوه يعنى

والله يسلمك

ياسر سليم said...

إنسانه

لاء الفرمته تأتى بغته

مش التدوين

الله يكرمك يا ست انسانة ويسلمك

ويكرمك برضه ونتعزم على فرحك ان شاء الله

سلامات

ياسر سليم said...

دكتور حر

منور المدونة يا دكتور

وانا سعيد جدا انى قابلتك بجد

فرصه سعيدة جدا

والله يسلمك وينولنى اللى فى بالى :)

ياسر سليم said...

نــور

الحمد لله انها بتحصل فى احسن العائلات مش عندى انا بس كنت هبقى مضايق

ومتشكر جداً على الدعاء الجميل ده واقول آمين

عشان الواحد فى مفترق طرق

وان شاء الله مش هحرمكوا من ابداعاتى .. لو يعنى بتسميها ابداعات

ياسر سليم said...

radwa

الله يسلمك

وبالنسبه للتجند ما يقدروش يرجعوا فى كلامهم

دا انا ما صدقت


هو لعب عيال ولا ايه

ياسر سليم said...

ولـــو

كلام خفف على المصيبة

ربنا يكرمك

وربنا يرزقنى ببنت الحلال يارب امين

ياسر سليم said...

semsem

وحضرتك طيب

ومش عارف عوداً احمداً دى ردها ايه

الكل قايلهالى ..

عموماً شكراً على الزيارة ونورتى المدونة

ياسر سليم said...

محمود الدوح

شكلك كده متابع لمدونتى من زمان بس ما كنتش بتسيب تعليق

لحد ما جه اليوم اللى سبت فيه

عموماً شكراً على الزيارة

ياسر سليم said...

رينــا

نورتى المدونة يا ست رينا

وكل سنه وانتى طيبة

تخاريف خاصه! said...

عود محمود...ومنتظرين البوست الجديد..

The Manager said...

حمدا لله على سلامتك

وربنا يعينك فى شغلك وحياتك كلها إن شاء الله

وإن شاء الله يعينك على التدوين كمان بإذن الله

تحياتى ليك
:)))

بنت أبيها said...

حمد لله على السلامة

واحتفالا بهذه المناسبة السعيدة

انا مررت لحضرتك تاج

سلام عليكم

خالد أبوالفضل said...

عود أحمد بإذن الله تعالي
وبالنسبة للجهاز ..
لا بأس طهور إن شاء الله
ونسأل الله أن يديم عليه الصحة والعافية
أخوكم

gohayna said...

حمدلله علي السلامهيا اخي العزيز

وربنا يوفقك في كل حاجه بتعملها يارب

تحياتي ليك جدا

شقاوة شعب said...

عود احمد للتدوين

وكل اللى حضرتك حسيته لما هاردك اتفرمت انا لسا حاساه من كام يوم لما ضرب الجهاز فيروس قوى جدا
بوظ الهارد خالص وضيع كل اللى كان عليه

ياللا الحمد لله قدر الله وما شاء فعل

حاول ماتغيبش كتير عن التدوين

ahmed mefrh said...

الف حمد الله ع السلامه
و الف سلامه على اتلاجهاز يا سيدى من الفيروسات و فى انتظار جديدك
تحياتى اليك
ابو مفراح

همسة قلم said...

حمدا لله على سلامتكم اخونا الكريم ياسر

وألف سلامة على جهاز الكمبيوتر والهارد اللى اتفرمت

حصلت معايا مرة وكنت حاسة انى هموت لما شغلي ضاع من على الجهاز بس الحمد لله على نعمة النسيان فعلا :)

ورزقكم الله الزوجة الصالحة ويسر لكم اموركم كلها

مدحت محمد said...

حمد الله على سلامتك
ومنجيلكش فى جهاز متفيروس
تحياتى

Anonymous said...

السلام عليكم طبتم وطابت ايامكم بذكر الله
انا عاوزة اقول اني من ساعت مدخلت المدونة بتاعتك وانا مبسوطة انك بتكتب كل اللي شوفته وعشت فيه واللي بتشوفه واللي ممكن تشوفه انت ليك رؤي جميلة جدا وتحليل رائع في كل مواضيعك جزاك الله خيرا واتمني من الله ان يوفقك ويحقق لك كل ماتتمناه اللهم امين
هانستني الجديد ديما في مدونتك ومتنساش ان حياتنا ماهي الا كلمات

ياسر سليم said...

تحاريف خاصة

طيب الكل متفق على عود احمد .. اشمعنى انتى عود محمود

ماشى .. خالف تعرف

ياسر سليم said...

the manager

ازيك يا فندم

منور المدونة

وجزاكم الله خيراً على الدعوتين اللى على الصبح دول

ياسر سليم said...

بنت ابيها

جزاكم الله خيراً على المرور

وانا مش عارف اشكرك ازاى على الاحتفال الرائع اللى حضرتك فاجئتينى بيه

بجد بشكرك

ياسر سليم said...

خالد ابو الفضل

جزاكم الله خيراً على المرور

تحياتى

ياسر سليم said...

gohayna

الله يسلمك

وجزاكم الله خيراً على الدعوة الجميله دى

وتحياتى ليكى برضه جداً

ياسر سليم said...

شقاوة شعب

ما انا وصفت الإحساس صحيح فى التدوينة

احساس صعب جداً

عموماً ان شاء الله احاول ابقى موجود وما أتأخرش

ونورتى المدونة

ياسر سليم said...

ابو مفراح

الله يسلمك يا فندم

شكراً على وجودك

ونورت المدونة

ياسر سليم said...

همسة قلم

الله يسلمك اختى الكريمة

وجزاكم الله خيراً على الدعوة الجميله دى

وألف مبروك على الخطوبة

معلش جاية متأخر

ياسر سليم said...

doha

الله يسلمك

وربنا يسمع منك

ياسر سليم said...

Anonymous

جزاكم الله خيراً على الكلام الجميل ده

ورفع روحى المعدنيه .. ويارب ديماً اكون عند حسن الظن

وادينى نزلت بوست جديد اهوه

وان شاء الله احاول ما انساش حياتنا كلمات

نورتى المدونة