معقولة .. انا بدون تانى

السلام عليكم ورحمة الله وبركاته

أولاً : انا مش مصدق انى بكتب فى المدونة تانى .. بجد كنت قربت انسى التدوين وعالم التدوين

ثانياً : احب اشكر وأعتذر جداً لكل من دخل المدونة وسأل عليا وكان قلقان على طول الغيبة واقولهم ما تقلقوش لو حصلى حاجة وحشة ليا اصدقاء كتير متابعين للمدونات وهيعرفوكوا اى خبر مش كويس

ثالثاً : احب اقولكم .. انى أحبكم فى الله

رابعاً : سبب الغيبة دى بدأت كالآتى .. آخر بوست كتبته شرف ما بعده شرف كتبته بطلوع الروح عشان الجهاز كان عليه كمية فيروسات لا حصر لها وكل فيروس له وظيفة مختص بها فى حصارى والتضييق علىَّ ومش كده بس .. كانت سرعة النت .. سرعة ايه ما ينفعش أقول سرعة .. كان بطىء النت يجيب للكبير شلل أطفال .. فأنا قلت هحرق دمى ليه ؟ وانشغلت فى رمضان اللى يومة على ما ناخد بالنا انه بدأ نلاقيه أنتهى .. لحد ما رضيت عن الجهاز وفضيلته إنى اخلى حد يظبطه ويروقه .. وربنا يسامحه روقهولى على الآخر لدرجة انه لما عجز عن مكافحة كل الفيروسات فرمت هارد من الاتنين .. لأنى مشغل الجهاز بهاردين .. وساعات انا بعتبر ان الحجات اللى على الهارد دى ثروة الواحد .. لأن كل حاجه على الهارد إما تعبت فى البحث عنها على النت وتوصلت ليها وتعبت فى انتظار التحميل .. او تعبت لحد ما لقيتها عن واحد صاحبى وخدت الإم بى ثرى بفيروساته ونقلتهاله وانا خدت منه وقت عشان ينقلى وخدت منه وقت تانى عشان يشيل الفيروسات اللى نقلتهاله فالموضوع مش سهل عشان هارد يتفرمت بالسهوله دى وفى الآخر يعتذرلى ويقول انا حاولت معاه وما لقتش حل تانى .. ولما عرفت .. وكأنى أم فقدت ابنها اللى تعبت فى تربيته وكبر على ايديها فى لمح البصر فكما الموت يأتى بغته .. الفرمتة تأتى بغتة .. وبعدما عاد الجهاز للعمل وانتهى رمضان .. بدأ العيد فمر العيد كضيف خفيف .. ولما فكرت انى افتح الجهاز لأول مره بعد العيد تذكرت مصيبتى فى فقد ثروتى فأقفلت الجهاز وغضبت عليه .. ولكن النسيان نعمة عظيمة من الله .. الواحد مش هيعيش طول عمره عايش بحسرته على الهارد .. والهارد اللى ما اتفرمتش ابقى من الهارد اللى اتفرمت .. وقدرت انى اتغلب على احزانى وارجع للتدوين من تانى عشان احكيلكم على المأساه اللى مر بيها جهازى ..

خامساً : ما أوعدكوش انى هكتب بإنتظام .. يعنى ممكن الغيبة تطول .. عشان انا حالياً مش عايش حياه مستقره من ناحية العمل ولسه بظبط أوراقى وبرتب لشكل حياتى فى المرحلة القادمة وكمان الواحد لازم يشوف موضوع الجواز ده بقه .. أظن كفاية كده

سادساً : كل سنة وانتوا طيبين وعساكم من عوادة