Tuesday, April 22, 2008

مصر والسودان


قبل اى حاجة احب اعتذرعن تقصيرى فى حق المدونة
فبعد مجيئى إلى مصر بأسبوعين تقريباً سافرت إلى السودان

وانا الآن فيها


هذه صورة مبنى القائد معمر القذافى هنا فى الخرطوم وهو يعتبر من أجمل المبانى على الإطلاق هنا فى السودان



ودى صورة شارع عادى من شوارع السودان وعندهم توكتوك زى عندنا بس بيسموه ركشة والعربيات اللى وراه دى عربيات أجرة بيسموها أمجاد للمشاوير الخاصة وهى ارخص من التاكسى ولو تاخدوا بالكم تلاقوا ان واحده نمرتها بيضا وواحده نمرتها خضرا .. النمرة الخضرا ما تدخلش الخرطوم .. آخرها بحرى وامدرمان .. اما النمرة البيضا تروح وتيجى فى اى مكان فى العاصمة المثلثة .. اللى هى بحرى وامدرمان والخرطوم

ولو حد ربنا كرمه وجه السودان هيلاقى تناقضات يشيب لها الولدان
(حلوه الحته دى )

فبالرغم من وجود طبقة فقيرة جداً وبنسبة كبيرة فى السودان .. إلا ان الأسعار فيها تناطح اسعار اوربا والدول المتقدمة .. يعنى مصر بالنسبة للسودان رحمة

فقد يصل ايجار شقه الى 1700 دولار او يزيد فى الشهر الواحد

وتم اجراء مقارنه بين اسعار إيجارات العقارات فى مختلف الدول (على حسب كلام احد السودانيين ) فوجدوا ان أغلى شارع على مستوى العالم يوجد فى الخرطوم .. انا لم أمر به إلى الآن .. بس كنت راكب أمجاد فالسائق أشار لى إنه يقترب من المنطقة التى كنا نمر بها

هذا التناقض فى الأسعار والمستوى الإجتماعى

وهنا تناقض فى المياه .. فالسودان يوجد بها النيل الازرق والنيل الابيض وبالرغم من ذلك المية قاطعة معظم اوقات اليوم .. وتفادياً لذلك لابد من استخدام الخزانات

وتناقض ايضاً فى الموارد الزراعية .. فالسودان من أخصب الأراضى الزراعية على الاطلاق ولا يوجد بها أرض إلا وصالحة للزراعة .. ولكن يوجد غلاء فى أسعار الخضروات والفواكه
والخبز ايضاً أغلى من مصر

وتناقض فى الثروة الحيوانية .. فالسودان تمتلك ثورة حيوانية مهولة وإلى الأن لم آكل منها إلا مرتين

وبالرغم من طيبة الشعب السودانى .. إلا اننى وجدت مظهراً كنت اظنه فى مصر فقط .. ان الرشاوى منتشرة إلى حد كبير فى المصالح .. وقانون ابجنى تجدنى يكاد يغزو كل قطاعات المصالح للأسف الشديد

وإلى لقاء آخر إن شاء الله مع تدوينة أخرى .. ولا اعرف اين سأكون

23 comments:

Hannoda said...

شفت عنوان البوست ده عند المراكبي و جذبني جدا

بما إني خليط من مصر و السودان

وجيت و لقيتك هناك و فاجئني حنين ما كنتش أعرف له وجود جواي لدرجة إني دمعت

حنين لبلد مكتوب إسمها على جواز سفري لكن عمري ما حسيت ناحيتها بشوق غير دلوقت حالا


انا مستغربة جدددا


نفسي أسافر هنا و أشوفها و أقارن بين صورتها اللي فخيال و بين الواقع اللي انت صورت جزء منه دلوقتي

بسمع عن حال السودان دايما و أستغرب ليه التراجع الكبير جدا ده في كل شيء

رغم إن عندهم كل شيء

رحلة موفقة إنشاء الله و أجمل ما في السفر يغض النظر عن الغربة

هو الفايدة و الخبرة و الروح اللي بنكتسبها منه

إسمحلي بمصادقة مدونتك اللي أول مرة أزورها و أول مرة ده فاجئتني بحنين ولا كنت عندي خبر عنه

:)

تحياتي

Anonymous said...

ربنا يوفقك ويسهلك طريقك ويكتبلك ديما الخير
سنة اولي دكتوراه

Sally said...

ياسر
انا بردو قولت انك سفرت

بس ايه تنوع الثقافات
اللي انت عملهونا دا بس
:)

ربنا يوفاك ويرجعك مصر علي خير

دكتور حر said...

يا لذيذ يا رايق

انت بتقيس مصر من أجنابها ولا ايه؟

:(((

ربنا يرجعك بالسلامة
انا بعتلك تاج عالمقبره بتاعتك
عشان افوقك شوية لما تفوق تبقى تشوفه

ياسر سليم said...

hannoda

اهلاً بيكى وتنورى المدونة فى اى وقت
بس انا حاسس انى شفت تعليق من حضرتك قبل كده

عموماً مصر والسودان كانت بلد واحده ايام الملك فاروق

كان اسمه ملك مصر والسودان

هو فى اختلافات كتيرة فعلاً بين مصر والسودان .. لكن اللى يعيش فى مصر ويروح السودان ما يحسش بغربة والعكس برضه
عكس اى دولة اخرى عربية كانت او اجنبية

دا مش رأيي لوحدى ده رأى ناس كتيرة مصريين قابلتهم هنا فى السودان

ياسر سليم said...

سنة اولى دكتوراة

شكرآ على الدعوات الجميلة دى

وربنا يتقبل

ياسر سليم said...

رؤية

اعمل ايه بس

ما حدش بياكلها بالسهل

وانا قلت فرصة اشوف عادات الشعوب وتقاليدها

ومش بعيد اكتب كتاب عن رحالاتى حول العالم

ياسر سليم said...

دكتور حر

انا مش عارف اودى تاجاتك دى فين بس

قصدى جمايلك

عموماً انا هبص عليه كده واشوف هو يدخل ضمن اطار رسالة المدونة بتاعتى ولا لاء

جزاكم الله خيراً
وانا حاولت ارن عليك من نمرتى هنا فى السودان بس موبايلك مقفول

radwa said...

اخ ياسر
اعتقد هتسمي نفسك بعد كده الرحاله
(:

اول مره اعرف ان السودان فيها توكتوك
ترجع بالسلامه ان شاء الله

Anonymous said...

السفر الكتير ده حاجه حلوه اوى

الاول السعوديه و بعدين السودان

و المره الجايه فين ؟؟!!

ربنا يرجعك بالسلامه

Anonymous said...

السلام عليكم
ارجو من الله عز وجل ان يوفقك للخير وان تصبر علي رزقك وان تكون معتدل في حياتك وارجو من الله ان تكون موفق في سفرك وان تحقق كل ماتتمني ويرزقك الله بماانت تتمني....اتمني لك حياة موفقة ان شاء الله في كل شئ

سنة اولي دكتوراه

نـــــــور said...

بوست جميل
حسيت كأني روحت السودان وجيت

المرة الجاية هتودينا فين يا استاذ ياسر؟

:)

yasmina said...

حلو وصفك للسودان

شكرا جزيلا

تحياتي

ياسر سليم said...

radwa

هو انا لسه هسمى

ما انا خلاص سميت واللى كان كان

اما بالنسبة للركشة .. فدى وسيلة مواصلات مهمة جدا هنا

ربنا يكرمك وتزورى السودان ان شاء الله

ياسر سليم said...

mariam

السؤال ده بقه لسه ما اعرفش اجابته ايه

بس غالباً لو رحت فى بلد قريب تانى .. هتبقى ليبيا

والله اعلم

ياسر سليم said...

سنة اولى دكتوراة

جزاكم الله خيراً على هذه الدعوات الجميلة

وياريت نشوف لحضرتك مدونة قريب

نتعرف على افكارك وآراءك

واحد من الفلاسفة الله يمسيه بالخير قال
تكلم حتى اعرفك

ياسر سليم said...

دكتورة نور

لحد دلوقتى لسه مااعرفش هروح فين تانى

بس انا ممكن استقر فى السودان فترة

الله اعلم هتطول ولا هتقصر

ياسر سليم said...

yasmina

لا شكر على واجب

دى اقل حاجة ممكن اعملها

تحيات كثيرات

رينـــــــــــا said...

الله يكوووووون فى عونك

Hannoda said...

أخبار الجو العام عندك ايه.. سمعنا عن حظر تجول و قلق .. يارب تكون بخير

ولا يمكن تكون خلاص سافرت و سبت السودان و شديت الرحال على مكان تاني

عموما تمنياتي ليك بالتوفيق دايما

Anonymous said...

السلام عليكم ورحمة الله ووبركاته
طبعا كلنا عارفين اللي بيحصل في السودان دلوقتي يارب تكون حضرتك كويس ونتمني ليك السلامة ويارب ينجي المسلمين في كل مكان ويصبر اهالي الضحايا اللي بتموت من غير ذنب والمشاهد اللي الواحد بيشوفها كل يوم
رياريت كلنا ندعي ان ربنا يفك كرب المسلمين ويهدي الجميع ويارب نعيش حياة فيها هدوء بدل اللي بيحصل ده
اللهم امين
رحمتك يارب
سنة اولي دكتوراه

Anonymous said...

اما بالنسبة للمدونة فاانا بصراحة لسة مااعرفش هعملها امتي خصوصا اني في فترة امتحانات وربنا معايا ومع الجميع ان شاء الله
فاانا حاليا مختصة بالتعليقات وان شاء الله انتقل لكتابة مدونتي وتبقي حضرتك من قرائها لانك صاحب ارقي المدونات وشرف ليا ان حضرتك تبقي زائر مستمر
ربنا يكتبلك الخير ويوفقك اللهم امين
سنة اولي دكتوراه

sharkawoo said...

الفرق ليس كبير طبعاً بين مصر والسودان فحتي وقت قريب كانا بلد واحد ...

وأعتقد ما أي مشكلة قد تواجه أي بلد في الدنيا مثل الرشاوي والسرقة وما حولهما ما إلا لظلم من علي هذه البلاد ...

ربنا يرحمنا ...