Saturday, June 23, 2007

يمكن هـزار

كل ما أفتح الأخبار
أندهش
ألاقى نفسى محتار
وبرتعش
أكدب اللى بشوفه
وأقول معلش
يمكن ده هزار
معقولة أخ يضرب أخوه
بالنار !؟
هما أعدائنا خلصوا !؟
وبناخد بالتار !؟
يا أخوانا فهمونى
ولا على الحال ده هتسيبونى
مين بيضرب مين
فى بلاد المسلمين !؟
مين بيحرق إيه !؟
وليه !؟
وإحنا ليه ساكتين !؟
هنلاقيها منين بس
ولا نلاقيها منين
كل يوم همومنا تكتر
بدل الهم بيبقى اتنين
جوه بلادنا
متهانين
وبره اخواتنا
متخانقين

68 comments:

انتظار مؤقت said...

يا رتهم اخوانا متخانقين لكن دول متقطعين و محدش عارف اخرتهم ايه
تحياتي

cleopatra said...

:( اتكلم ؟

هقول ايه يعني .....

والله مش لاقيه حاجه اقولها

:(

ولــــــــــو said...

هو بصراحه احنا نستاهل يحصلنا كده
فكره انك لو مش متفق معايا تبقى عدوي حتى مع اقرب الناس لينا بغض النظر عن اني ممكن اكون غلظ بقت مسيطره علينا بشكل مرعب
الغرور والاحساس بانك العالم ببواطن الامور وان المسأله انت اللي هاتحلها والا مش هاتتحل خلت رؤيتنا للامور توصل لحد الهجوم والحاق الاذى بالآخرين
علشان كده ماتستغربش لو جيت تفتح المدونه بتاعتك ف يوم ولقيت رساله بتقولك آدي جزاء اللي يكتب حاجه انا مش راضي عنها
وصوره واحد مطلعلك لسانه
ربنا يعافينا ويهديهم
بوست رائع
كالعاده

Sally said...

علي راي كليو الواحد مش لاقي حاجة يقولها
اللهما إلا الدعاء

اللهما ابصرهم للحق وأصلح بينهم والف بين قلوبهم وكن لهم ولا تكن عليهم
اللهم امين

دكتور حر said...

السلام عليكم أستاذ ياسر
أنا سعيد جدا بالتعرف على مدونتك الجميله

بالنسبة للموضوع
لقيت حديث للنبي عليه الصلاة والسلام يصف حالتك في آخر الزمان

في قوله للصحابه عن اخبارهم بأن هناك زمن يجعل فيه الحليم حيرانا

فاللهم أرنا الحق حقا والباطل باطلا

الحلم العربي said...

فعلا
احنا من ضعفنا في وجه أعدائنا بنحارب بعضنا

تحياتي

يا مراكبي said...

كنت في كربلاء
قال لي الشيخ أن الحسين
مات من أجل جرعة ماء ..
وتساءلت
كيف السيوف استباحت بني الأكرمين
فأجاب الذي بصرته السماء :
انه الذهب المتلألئ : في كل عين .
.............
إن تكن كلمات الحسين
وسيوف الحسين
وجلال الحسين
سقطت دون أن تنقذ الحق من ذهب الأمراء
أفتقدر أن تنقذ الحق ثرثرة لشعراء ؟
*****
ده كان الراحل أمل دنقل .. ومش هأقول أكتر من كده

همسة قلم said...

هنلاقيها منين ولا منين

صدقت أخى

الواحد مش عارف يقول ايه على اللى بيحصل

ربنا ينصر الحق على ايد اللى بيدافعوا عن الحق

.......

اه يا دماغى said...

والله كلان قليل بس جامد
فى الجون
كنت كتبيت فى الاخر وعجبى عشان تكمل
شكرا لزارتك مدونتى وكويس ان فى حتجة عجبتك زاحب اشوفك علطول
يمكن حاجة نانية تعجبك
تحياتى

ياسر سليم said...

انتظار مؤقت

ربنا يعدى اليومين دول على خير وبأقل الخسائر

تحياتى

ياسر سليم said...

cleopatra

انا خدت بالى انك عديتى على كذا تدوينه وسيبتى فيها تعليق ..

ربنا يكرمك

وعندك حق ما فيش حاجه تتقال

ياسر سليم said...

ولـــو

هههههههههههههههههه
عجبتنى قوى حته انى ممكن فى يوم من الايام افتح ألاقى واحد مطلع لسانه دى ..

وعلى فكره حلها سهل خالص .. انك ممكن تعمل مدونة تانيه وتقول للناس ان انته هنا .. وهما هيشوفوا صورة اللى مطلع لسانه فى المدونة القديمة .. هيعرفوا ان فى حاجه حصلت :)
ههههههههههههههه
خليتنى احكى قصة

تحياتى

ياسر سليم said...

بالله المستعان

آمين

ربنا يتقبل دعائك يارب

نـــــــور said...

ربنا يكرمك ، ويباركلك في قلمك واشعارك الجميلة

انا بس عايزة اقول ، حاجة ظريفة جدا الاعلام الغربي بره مصور الصورة صح .. ان حماس بتطهر غزة من بعض الخونة من فتح .. مش الاعلام العربي الخايب بتاعتنا

اقتتال فلسطيني داخلي.. وحماس وفتح بيموتوا في بعض .. مش دي الصورة الصحيحة للأسف

مش بيمتوا في بعض وانما الاقتتال بين الخونة الدحلانيين وبين حماس .. والله يهدي الجميع

المجاهدة said...

ربنا يصلح الحال..


اسلوب جميل في الكتابة يا اخي ماشاء الله
:)

عازف الناى said...

وايه اللى محيرك بس ياياسر
فى ناس بتقول ع المؤمن كافر
وفى حكومه زى الوحش الكاسر
بتنهش فينا بالسنان والضوافر

بقينا عرب بالاسم بس
بقينا اعداء من غير ما نحس
زى ما يكون صابنا مس
من شيطان امريكى قادر

يزرع فتن ونجنى اهوال
يزرع مكر ونخسر رجال
يزرع حقد بين ابطال
ضحوا بكل نفيس ونادر

ياسر سليم said...

دكتور حر

تشرفت بزيارتك لمدونتى ..

وارجوا ان تتكرر الزيارة ..

وقمت بزيارة مدونتك ..

وحقاً لا نجد غير الدعاء

اللهم أرنا الحق حقاً وارزقنا اتباعه وارنا الباطل باطلاً وأرزقنا اجتنابه

ياسر سليم said...

الحلم العربى

وطبعاً العدو شمتان فينا ..

احنا بنخلص على بعض

تحياتى

ياسر سليم said...

يا مراكبى

يعنى الواحد يعمل ايه !؟

يتفرج وخلاص !؟

ياسر سليم said...

همسة قلم

آمين يارب

ربنا ينصر الحق .. ويبطل الباطل

ياسر سليم said...

اه يادماغى

الله يخليكى

وان شاء الله مش هتكون اخر زيارة للمدونة ..

ويارب ديماً فى تقدم

تحياتى

ياسر سليم said...

نـــور

ربنا يكرمك ..

ما هو للأسف الإعلام العربى بيشتغل لهواه ولأغراضه و ليه مستهدفاته هو كمان إلا من رحم ربى

ربنا يزيل هذه الغمة عن الأمة

ياسر سليم said...

المجاهدة

يعتبر انتى الوحيدة .. أو ممكن حد كمان يتكلم عن اسلوب الكتابه

كل اللى اتكلم اتكلم عن الأوضاع ..

جزاكم الله خيراً

ياسر سليم said...

أخى الجاهل

دا انته طلعت زجال كبير ..

بسم الله ما شاء الله ..

انته فى منك امل كبير .. بس اكتب وورينا ابداعاتك

تحياتى

جهاد خالد said...

مش اخواااااااااات
مش اخوااااااااااااااااات
دول اهل وطن
وشوية خونة وعملاء
مش اخوااااااااااات
أقولها تاني
مش
ا
خ
و
ا
ا
ا
ا
ت



مش هزار على فكرة جد
:)

ربنا يرزقنا الهداية

جهاد خالد said...

أما عن الاسلوب
جميل
بس صغيرة
عيزين نفس طويل لو سمحت المرة الجاية

gohayna said...

بصراحه حاله تكسف

بجد مش عارفه امتي نفوق والناس تعقل

امتي نبطل نخلي الناس تضحك علينا

العالم بيتفرج علي الاخوات وهيا بتدبح بعضها بدم بارد

والرؤساء يجتمعوا في شرم الشيخ علي البيسين

عشان البرونزاج السنوي بتاعهم وبالمره يناقشوا المشكله بين وقت الغداء والتدليك

حاجه تقرف يا سيدي


كلماتك بتوجع وساخرة جدا جدا

تحياتي ليك

Unknown said...

دخلت المدونة باكية وإزدادت دموعى مع الكلمات

بجد حسبنا الله ونعم الوكيل
-------------------

كلماتك جميلة جدا ياخى ما شاء الله لا قوة الا بالله .. ربنا يزيدك

سلام عليكم

Dalia said...

انا بصراحه مش عارفه هما بيضربو بعض ليه ؟؟

:(

Anonymous said...

قبل كده كنت بقرا كتاب لمصطفى محمود مش فكره اسمه
كان بتكلم على الاخبار والجرايد انها بتحرق الدم وبتجيب شلل وبتتعب الاعصاب ... وقال وماله ما هو ده الوسيله الوحيده اننا نعرف ايه اللى بيحصل
مش عارفه افتكرت الكلام ده لما قريت البوست ... مش عارفه ليه

Anonymous said...

سألت سؤال فى المدونه عندى ويهمنى جدا اعرف رأى المدونين و ازاى هيجوبوه
عسى ان تعم الافاده
.
.
.
الدعوه عامه

ياسر سليم said...

النجميه الصامدة

خلاص عرفنااااا

عرفنااااا

ع
ر
ف
ن
ا
ا

وبالنسبة لطولها ..

فأنا فعلا ديما نفسى قصير وما باصبرش شوية ..

بس بإذن الله فى الأعمال القادمة تكون أطول من كده

ياسر سليم said...

gohayna

كلماتك انتى اللى بتوجع

مش عارف .. باين كل حاجة دلوقتى بتيجى على الجرح

ربنا يعدى اليومين دول على خير

ياسر سليم said...

إنسانة

نورتى المدونة ..

بس اللى انا استغربتله .. انتى كنتى داخلة المدونة اساسا باكية !؟
ليه يعنى !؟
تأثر بحاجة تانيه !؟

وربنا يباركلك على الكلمات الجميلة دى

تحياتى

ياسر سليم said...

Dalia

للأسف مش انتى بس

دا اللى عارفين أقلية جداً

وبقية الناس مش فاهمة ايه اللى بيحصل ..

عموماً انا لو عرفت ممكن ابقى اقولك

وانتى برضه لو عرفتى ما تنسيش تقوليلى

تحياتى

ياسر سليم said...

حراس الحقيقة

هو تقريباً احنا لو كشفنا على نسبة السكر عندنا هنلاقيها عالية وهنلاقى عندنا ضغط .. كل ده من الأوضاع الراهنة

وانا جاى مدونتك حالاً ان شاء الله

تحياتى

هوندا said...

الحمدلله انا مبقتش اتفرج ع التلفزيون عشان مرارتى اتاكلت عملت مقاطعه ههههههه

عمرو المصري said...

الي اولئك الذين المهم صور اقتتال الاخوة الاشقاء في فلسطين


الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها


الي كل من انجر وراء حملة التضليل الاعلامي التي ساقوها علينا

الي كل ساع الي الحقيقة

الي كل هؤلاء اهدي

التبيان في اقتتال الاخوان

تجدونه فقط

في

ارض الحرب

ياسر سليم said...

HoNdA

ممكن نقول ده حل كويس ..

بس مش كويس قوى ..

لأننا المفروض نهتم بأخبار المسلمين

ياسر سليم said...

عمرو المصري

ماشى يا استاذ عمرو

شكراً على الدعوة

حسن ارابيسك said...

تقول لمين وتعيد لمين
على رأي جدتي
الناس خيبتها سبت وحد واحنا خيبتنا ماوردتش على حد

أتمنى تشريفك لي في مدونتي
هاتنور بزيارتك ليها

دعوة لزيارة مدونة شاعر تستحق الزيارة

حسن ارابيسك said...

عفوا
نسيت أعطيك لينك مدونة الشاعر المصري المغترب
http://mosaiiic.blogspot.com/

غمض عينيك said...

كلماتك جميلة اوي ياياسر وبتوصف فعلا حالة الذهول والدهشة اللي الةاحد بيشوف بيهم اللي بيحصل في فلسطيو وكاننا انتصرنا على كل الناس ومبقاش فاضل غيرنا

تحياتي
محمد سمير

yasmina said...

للاسف يا ياسر كلامك صحيح

المسلمين بيقتلوا فبعض فكل مكان
واحنا مش عارفين نهاية الصراعات الداخلية
لا حول ولا قوة الا بالله

تحياتي

FadFadA said...

فرجه قريب
ربك يفرجها من حيث لا نتوقع
ربما تكون الصورة بتغمق قوي , بس أكيد مسيرها هتنور , و هتنور قوي ان شاء الله
إن الله لا يغير ما بقوم حتى يغيروا ما بأنفسهم
إن تنصروا الله ينصركم

محمد

صاحب البوابــة said...

ويستمر نزيف الأمة

ونحن بلا حراك

تحياتي للتدوينة القوية

والمدونة الرائعة

Rehab Saber said...

... ان بعد الليل فجر

اسلام رفاعى said...

اسمحلى اقول لحضرتك
يخطىء من يظن ان حماس تحارب فتح ولكن الذى يحدث عملية تطهير لغزة من الخونة والمرتزقة والعملاء تأخرت كثيرا لكى يقف حمام الدم السائل على ايدى الخونة اللحديين عملاء أمريكا واسرائيل

جهاد خالد said...

هل أنت مسلم مهتم لأخواتك المسلمات؟
هل تؤمن بدور المرأة في تربية وإصلاح المجتمع؟
هل تحلم بجيل من الفتيات كالخنساء ورفيدة؟

إذا شاركنا مقترحاتك وآرائك ورؤيتك
على مدونة
بـنـاتـيـت
www.banateet.blogspot.com

ياسر سليم said...

حسن ارابيسك

نورت المدونة ..

وان شاء الله هجيلك زيارة ..

وشكراً على اللينك

تحياتى

ياسر سليم said...

غمض عنيك

ربنا يكرمك ويرفع من روحك المعنوية زى ما انته دايماٍ رافع من روحنياتى

تحياتى

ياسر سليم said...

yasmina

الشاعرة الكبيرة

زيارتك ليا ديما بيبقى ليها شكل خاص

تحياتى ليكى

وديما بتنورى المدونة

تحياتى

ياسر سليم said...

fadfada

عندك حق ..

لازم بعد الظلام فجر ينور

ربنا يفرجها من عنده

تحياتى

ياسر سليم said...

صاحب المدونة

جزاكم الله خيراً على المرور

وشكراً على هذه الكلمات الطيبة

واتمنى ان تسعدنى دائماً بتعليقاتك

تحياتى

ياسر سليم said...

Arabian GiRl(caaaaat)

رنين الصمت

حقاً

ان بعد الليل فجراً

ياسر سليم said...

اسلام الرفاعى

كلامك سليم

ولكن انا لم اقصد فلسطين فحسب

تحياتى لك

ياسر سليم said...

النجمة الصامدة

جاى ان شاء الله اشارك

بس بلاش حكاية انتى البنوتة رقم كذا دى

عشان انتى عارفة الناس عندنا فى البلد

نسرين - أمة الله said...

السلام عليكم
ليه كده بس انت غاوى تتعبنا
بس برضه انت مش جايبه من بره
ربنا يرحم المسلمين

mo'men mohamed said...

بالظبط كده
أعدائنا خلصوا
عارف ليه
لأن فى مينا أخدوا اعدائئهم اصدقاء وبكة ميبقاش قدامنا غير اخواتنا نقتل فيهم
السلام عليكم

The Manager said...

شئ طبيعى يا فندم

طالما مفيش توكل على الله

وطالما ان كل واحد نفسه مش صافيه وله غرض مش كويس بيخليه يستحل يأذى أخوه يبقى خلاص إللى بيحصل عادى جدا

وربنا يصبرك ويصبرنا إن شاء الله

بس كلماتك إللى عجبتنى جدا والله

جزاك الله خيرا :)

عمر عاشق القرآن said...

لو هزار يبقى هزار دمه تقيل
وللاسف هو مش هزار للأسف

بس عايز اقولك حاجة .. أحيانا بيكون أعداءك و أعداء الوطن من بنى جلدتك ((والحدق يفهم بقى ))

ياسر سليم said...

نسرين - أمة الله

انتى قلتى اهوه ..

انا مش جايب الكلام من عندى

ربنا يجمع شمل المسلمين

ياسر سليم said...

mo'men mohamed

منور المدونة ..

العدو خلاص بقه بيتفرج علينا واحنا بنضرب فى بعضنا وهو قاعد ما بيتعبش نفسه

تحياتى

ياسر سليم said...

The Manager

ربنا يرزقنا التوكل عليه

ويصبرنا جميعاً

شكراً على الكلامات الجميلة ..

تحياتى

ياسر سليم said...

omar مشروع بطل

ههههههههههههههه

انته اول واحد يعلق على العنوان

بس تعليق جميل والله ..

شكرا لك ومنور ديما المدونة

تحياتى

رينـــــــــــا said...

بسم الله الرحمن الرجيم
لاجابه حماس

يا مراكبي said...

إنت كان سؤالك في البوست هو: فهموني ليه كده

وأنا جاوبتك ليه

دلوقت إنت بتسأل سؤال تاني خالص: طيب نعمل إيه؟ نتفرج وخلاص؟

للأسف أيوة .. لأن المنكر ده تغييره بيكون باليد وده أكبر من حدودك إنت اللي هي تغيير المنكر بالقلب واللسان

تائهة فى أرض الأحلام said...

كنا زمان بنقول احنا محتاجين صدمة تفوقنا
لكن من الصدمات شوفنا كتير
ومفيش فايدة

مشكلتنا الرئيسية أننا نسينا ثقافة الصراع اللى اتكلم فيها هيكل
احنا محتاجين نرجع تانى نغرس ثقافة الصراع فى أولادنا ونعرفهم ان أعدائنا هم اسرائيل وامريكا بس وعمر ما السنة أو الشيعة هم أعدائنا ونرجع تانى نحكى حكاية الأسد والثيران الثلاثة

يمكن تقول انى بتكلم فى نقطة سطحية عيالية هههههههه لكننا فعلا محتاجينها
لاننا وصلنا لمرحلة مابقناش قادرين نحدد مين هو عدونا الحقيقيى