Friday, October 29, 2010

بين الواقع والأحلام



-
-
يتمني الإنسان في كثير من الأحيان أن يستمر في أحلام اليقظة وعدم الاصطدام بالواقع .. حيث الألم وزوال الكثير مما يحلم به ويعيش فيه على أنه حقيقة .

ومن وجهة نظري أن لأحلام اليقظة جانبين أحدهما سلبي والآخر إيجابي ..

فالجانب السلبي هو الإستمرار في الأحلام والرضى بذلك على أنها حقيقة واقعة ونكران الواقع مما يؤدي إلي عدم العمل لتغييره الذي هو فى الغالب صعب وأليم .

أما بالنسبة للجانب الإيجابي فأحلام اليقظة تقلل من حدة التوتر والضغط اللذان يسببهما الواقع وقسوته على كثير من الناس ويعطي أملاً بالمستقبل وسعادة ولو مؤقتة بما يمر به من أحلام وهذا الجانب لا يتأتى إلا بتجنب مجاراة الأحلام لتكون ملازمة للفرد ؛ فيهرب الإنسان هروب مؤقت من واقعه الأليم إليها .

لذلك قد يستفيد من ذلك من لازمته الكآبه واليأس والإحباط والنظر إلى المستقبل على أنه مظلم كالح بالتمرن على أحلام اليقظة فيعيش فيما يعجز عن تحقيقه في المستقبل .. ثم يعود إلى واقعه وقد ملأه التفاؤل والأمل ليبدأ العمل من جديد .
 

Wednesday, October 13, 2010

نفسي يا بلدي




نفسي أحبك يا بلدي

وافخر تقولي عليا ولدي

يا ارض أبويا وجد جدي


نفسي يا بلدي لما أدي

ألاقي مقابل وايد بتدي

مش كل حاجة انتي تاخدي


نفسي ألاقي فيكي نفسي

و احقق طموحي وابني نفسي

من غير يا بلدي عليا تقسي


نفسي اعيش فيكي بأمان

مش عايز اعيش عيشة جبان

مش انتي أمي .. فين الحنان ؟


نفسي أقول : حياتي ليكي

وكل عمري عشان عنيكي

وزي ما خدت يا مصر اديكي


نفسي اسافر ولما أغيب

احس بشوق في قلبي ولهيب

وارجع لحضنك يكون طبيب


نفسي أشوف حكومة أدائها نظيف

مش تحمي العصابة وتقبض ع الشريف

وتدي للحرامي وتنقص في الرغيف


وتزود في البطالة وتزيد معاه اسعار

وتخلي الكل يطفش وتخلي بلدنا نار

وتفسد الاعلام ويقول يا مصر عمار


نفسي يا بلدي ألاقي صناعة

سبقنا فيها أو حتى زراعة

دا حتى م المرض ما عندك مناعة


نفسي أشوف علم وتعليم

وجرايد معارضة بدون تحريم

وكمان اعلام من غير تعتيم


نفسي في مصر أخلص ورق

من غير رشاوي أو شغل بزهق

أو واسطة تدخل أو اعمل قلق


نفسي يا بلدي ألاقي ميزة

أو أي حاجة تكون عزيزة

غير رغيفك اللي بـ بريزة


نفسي يا بلدي تحسي بيا

نفسي اشرب فيكي مية

تكون نظيفة تكون نقية


نفسي يا بلدي فـ أمن دولة

تحب المواطن مش ظالمين عتاولة

وتخاف ع البلد ما تبقاش مقاولة


نفسي يا بلدي وقبل ما اموت

اشوف حد تاني .. ليه عايزة سكوت ؟

من يوم ما اتولدت واحنا في تابوت

تابوت بالطوارئ وكتمان كل صوت


يا مصر فيكي ثروة بشر

في كل مجال يخلو الحجر

ينطق ؛ وياريت ده فيكي طمر


أقول كمان يا بلدي نفسي في ايه ؟

نفسي شبابنا يفوق م اللى فيه

يبطل يقول : مالي وليه ؟


يبقى ايجابي يخاف ع البلد

يقول الحق ينكر ؛ ما يخاف من احد

يخاف الظلم ديما من شعب اتحد


أوعي تفتكري يا بلدي انى ما بحبكيش

انا بس بعتب عشان مش قادر اعيش

انا بس بعتب عشان مش قادر اعيش
ياسر سليم
10-10-2010