Tuesday, July 3, 2007

أنا والكورة وأسبانيا

ـ
ـ
كل كام يوم أسمع أن فى النهارده ماتش مهم قوى وحاسم وفاصل وعلى أساس الماتش ده هيتحدد مصير الأمة قصدى الفريق .. وكل اللى ممكن أعمله أسأل الماتش بين مين ومين وإذا اهتميت قوى أسأل فى نهاية الماتش هو انتهى كام كام .. وبصراحة من كام سنة كده عديت خطوطى الحمرا مع الماتشات وأتفرجت على الأهداف اللى حققها الفريقين فى ماتش كان مهم قوى
ـ
ـ
كيف بدأت حكايتى مع الكورة !؟
ذكرياتى مع الكورة كانت ذكريات مريرة .. انا حاولت كتير ابقى من المهتمين بالماتشات وأسامى اللعيبة والحجات الهبلة دى .. بس الحمد لله فشلت
ـ
ـ
لما كنت أفكر ألعب كورة وانا صغير .. كانوا يوقفونى جون .. وأفتكر ان فى مرة من المرات جت الكورة فى وشى ووشى نمل وحالتى بقت حالة .. من بعدها كانت اى كورة تيجى ناحيتى اوسع لها الطريق علطول وكانت حاجة من الاتنين .. اما تطلع برة .. مصلحة يعنى .. او كانت هتدخل جون .. وكنت اقول فيها ايه لما تدخل جون ما كله لعب .. المهم ان الكورة ما تجيش فى وشى تانى وده كان مبدأى .. بس مبدأى ما كنش للأسف هو مبدأ فريقى .. كان الفريق بيطلع خسارته عليا .. وكأن أنا السبب فى الهزيمة
ـ
ـ
كبرت وكبر معايا كرهى للكورة وذكرياتى الأليمة .. وكان حظى حلو إنى نشأت فى عائلة ليس بها مشجعين للكورة ولا مهتمين بها من الأساس
ـ
ـ
وعرف أصدقائى كرهى للكورة واللى بيلعبوها وإستهيافى للى بيتفرجوا عليها
ولما سألت أحد زملائى مره .. الماتش الساعة كام ؟ وكان من الماتشات المهمة قوى .. اللى ما بيعديش يومين ونلاقى ماتش مهم قوى .. قالى هوه انته ليك فى الكورة .. قلتله خلاص .. من النهاردة وجاى هيبقى ليا .. أنا بندم على كل ماتش فات فى حياتى وما أتفرجتش عليه
ـ
ـ
ولما كان أصدقائى المقربين جداً لهم ميولاً قريبة من ميولى ومالهومش فى الكورة .. سألت احدهم مش هتتفرج على الماتش بتاع النهاردة المهم قوى .. قالى هو أنا أهبل أضيع ساعة ونص من عمرى قدام ماتش كورة
ـ
ـ
وأيضا أخى مثلى تماماً فى بغضه للكورة وكان يومها ماتش مهم قوى برضه .. قلتله مش هتتفرج على الماتش .. قالى إيه هى هيفت ولا إيه !؟
ـ
ـ
وفى نهاية كل ماتش مهم قوى بين الفريق الأحمر والفريق الأبيض اللى مش عارف بيلعب لية .. وعمره ما فرح قلب جماهيره المخلصة .. اللى ما شافتش فريقها غلب فى يوم من الأيام وبرضة بتشجعة .. نلاقى الشباب الهايف كلة لبس احمر ومسك العلم الأحمر وضرب الكوتشى الأحمر وفجأة نلاقى الشوارع كلها أحمر فى أحمر.. وكأننا إستعدنا اسبانيا .. اسبانيا اللى ماضاعتش من المسلمين إلا عشان الهيافة

70 comments:

The Manager said...

يارب الحق اكون اول تعليق :D

إللى عاجبنى ان حياتك مع الكورة تشبه حياتى

حاجات كتير والله حتى موضوع الجون دة :D

كنت بقف جون برضه

امبارح سعة الماتش كنت مخنوق ومش عارف اطلع من جوايا الشعور بإنحدار عقول المشجعين إللى صوتهم بيعلى مرة واحدة تفتكر ان حد ولع فى بيتهم ولا حاجة

كتبت ابيات سريعة دون تفكير كدة

قولى رأيك فى جزء منها :

يعلو صوتهم بلا داعى

وليس في ايهم واعى

قززتنى اصواتا مشجعة

للنادى الأهلى والزملكاوى

صمٌ دائما وعقلهم بالى

لا يصرخون إلا بصوت عالى

-----

دى المقدمة :)

تحياتى على البوست الرائع
وعلى اصحابك اللى دماغهم كبيرة اكبر من دماغ ثلاث ارباع دماغات المشجعين مجتمعة

:D

عازف الناى said...

الاخ ياسر
بس متابعه الكوره حلوه والا ماكنش ثلث سكان العالم يهتمون بها وعموما نحترم رايك وان كنا مخالفين لك فى الراى
ابنى صارف كل مصروفه على الكوره ياريته يتعلم منك لانى مقدرش اوجهه وانا بستنى الماتش ومتابع جيد للكره

عين ضيقة said...

انت والكورة واسبانيا


طيب


سلام

Sally said...

انا بكره كوره القدم دي مووووووووووووووووت

نـــــــور said...

مااقدرش انكر اني بحب الكورة
مش عارفة ليه من وانا صغيرة

حتى كان دايما بابا يتضايق مني ويقول ان الكورة للولاد ..

انا الحمد لله رب العالمين مش بلاقي دلوقتي وقت اتفرج على التلفزيون من الاساس

المهم كلام حضرتك في الجون بحد .. كلام طيب جدا .. ونكأ جرح عميق ..

آآآآه ياني .. احنا رجالة اوي في الهيافة بس وممكن شاب يقطع اللي قدامه علشان اتريق على لعب اللعيبة ولا عشان اي حاجة تافهة .. لكن غير كدا

بلاش الواحد يتكلم احسن ..

جزاك الله خيرا

Anonymous said...

السلام عليكم
انا كمان مبطقش الكوره وخصوصا لما البيت بيتفرج عليها طول ما الماتش شغال بتسرع فى كل جون بحس ان البيت بيقع من الصريخ
بس مقدرش اقول عليها تفاها ... لان مينفعش الانسان يعيش طول عمره بيشتغل لازم يكون فيه وقت بيخرج من الروتين بانه يعد يشجع ويتحمس لفكره تنافس فريقين وحوارات التعصب الكروى دى... ده غير ان ليها اثار ايجابيه فى لم الشمل المصرى وحب العربى فى الشعب المصرى خصوصا بعد كاس افريقيا ... وعلى فكره ده مش كلامى ده كلام الناس اللى حبت مصر او فرحت لمصر بعد الكاس

همسة قلم said...

شخصيا
مش بحب كرة القدم ولا المباريات بتاعتها لكن علشان الانصاف بحب اعرف نتيجة المباريات النهائية ..:)

لكن عمري ما تفاعلت مع نتيجة ماتش او فوز فريق على فريق

بس مع احترامي الشديد لوجه نظرك اخى الكريم ياسر

متابعة المباريات او كرة القدم عموما رياضة مفيدة وممتازة وليست في حد ذاتها هيافة

لكن الهيافة اللى بنشوفه من توابع المباريات دي بين الشباب والاهتمام الاوحد بنتيجة ماتش او مباراة كأن العالم خلى الا من مباريات كرة القدم

يعني انا اشجع الشباب انهم يتابعوا كرة القدم .. لكن بحدود من غير هيافة

اى نعم اناكنت بتشللللل لما ابي الله يرحمه يتفرج على ماتش لأني مش بحب اتفرج عليها اساسا لكن كنت بحترم جدا انه خلص كل اللى عليه وتابع هواية من هواياته وهى كرة القدم

لعل قصدي يكون وصل لكم اخى الكريم:)

ومعذرة على الاطالة

عمرو غريب said...

بصراحة والله بوست اكثر من رائع ومؤثر وانا عاوز اقولك حاجة ان سبب اهتمام الناس بالكرة والتشجيع بتعصب الي درجة الجنون هو فقدان الانتماء فبيلقو حاجة فيها منافسة ومتعة في نفس الوقت حاجة بتحقق لهم الفرحة

مش هنسى said...

عارف بامعلم ياسر كلماتك جميلة جدا بس بجد قلبت على أحزان كتير ولازم تعرف مش أسبانيا بس اللى ضاعت بالهيافة لا فلسطين ضاعت بهيافة العرب والعراق بهيافة الحكام والدنيا بهيافة المسلمين لما نسيوا دين ربهم ماشى يامعلم ياسر وانت عامل ايه دلوقتى

just-amuslim said...

أتكلم اقول ايه ؟؟!!!

ممممممم


عجبتني نبرة السخرية دي ..

بس مش دايما تبقى مفيدة ..

أنا مع همسة قلم في رأيها ..

....

الاخ ياسر ..

أول زيارة ..والحمد لله ..

كانت باسمة ..

yasmina said...

اخيرا لقيت شباب بيكرهوا الكورة

لان كل قرايبي مجانين كورة
مش عارفة بيتفرجوا على ايه بالضبط

طول عمري من وانا صغيرة بقول انها لعبة مملة

واخر جمله انت كتبتها فعلا جابت المفيد

سلام

ibn nasser - ابن ناصر said...

اناوانا صغير كنت حارس مرمي والحيا لا تختلف عن كة القدم كثيرا فمنذ ولادتي وانا في موقف المدافع عن كل شيء

تحياتي

رينـــــــــــا said...

ان ان ااااااااااااااااان
ايه الكلام الكبير دا
دا انت دخلت فى حارة سد :D

الصراحه عندك حق

Unknown said...

تعرف ساعات احس ان الناس من غلبها ومن كتر ان مافيش حاجة بتفرحها بتتلكك على اى حاجة عشان تفرح حتى لو حاجة عبيطة وماتستاهلش

فكرتنى بكلام محمد صبحى مع منى الشاذلى لما قالها احنا عاملين زى الطالب اللى سقط فى كل المواد
الكميا والفيزيا والاحياء والرياضيات و و و و
بس نجح فى الألعاب
هييييييييييييييييييه
الناس كلها تفرح اوىىىىىى انه نجح فى الالعاب ومش مشكلة باقى المواد اللى ضاع فيها

ربنا يسترها ع الأمة دى بجد حالها كرب

Anonymous said...

نهاية غير متوقعة لموضوع الكورة .. بس ربط جيد جداً بين الاتنين
بالنسبة لموضوع الكرة .. انا احب اقولك اني زملكاوي صميم .. بس مشكلتي ان متفرجتش على اي ماتش للزمالك من حوالي سنتين .... بس اسمع ان الفريق عنده مشاكل الفترة دي او حاجة زي كدا ..
بما ان حضرتك بقى من محبي الكورة .. ياريت تنزل لينا بوست عن مستقبل الكورة في مصر وخصوصا فريق الزمالك في ظل الظروف الراهنة .. ويارت برضو لا ننسى الاعب حسام حسن وظروفة الصعبة .. احسن انا على ما اسمع كدا انه عمال بيتنقل بين نوادي مصر لحد ما قرب يلعب مع نادي أسوان " وللاعب الكبير جزيل الاحترام على مجهوده "
وبالسريع كدا انا ممكن ارتجل لك شعر او نثر او كلمات لايقة على بعضها .. اللي تسميه ..
وكم من كورة ذهبت .. بعيدا عن شباك الخصم
وآه لو كانت دخلت .. لما كنا ذهبنا القسم
نعيش نتابع الماتشات .. وحافظين اللاعبية بالاسم
تهون حياتنا دايما .. ولا يشمت فينا خصم

وفي النهاية أنقل لك اعجابي بالبوست الذي حضرت مولده :) .. ونأسف لعدم الإطالة أكثر من ذلك

عصفور المدينة said...

جزاك الله خيرا أزيد عنك أنني متابع مواعيد المباريات وبانزل الجداول من النت عشن اخرج أولادي أوقات المباريات
:)

ولــــــــــو said...

مش عارف ليه كل اللي مابيحبش الكوره يقول كنت باقف جون
تفتكر ايه وجه العلاقه بين الاتنين
وهل لو كنت جيبت جون وانت صغير كنت هاتحب الكوره

انا كنت لفتره قريبه متابع جيد بس دلوقت
i don't care
شكرا ليك واتمنالك تحقق كل اهدافك وتهز الشباك كتير

gohayna said...

والله انا حبي للكوره بيتمثل في اني بقعد اغيظ والدي لانه اهلاوي

وانا بحب اغيظه مش اكتر
بتشجيع الفريق المنافس ايا كان

لكن عن نفسي مليش اي ميول كرويه


ربنا معاك بقي

الكوره دي اصلها بتحرق الدم والله

تحياتي

دكتور حر said...

والله لو مفيش إلا الكوره اللي بتفرح الناس بس دلوقتي


سيبهم يفرحو
أنا عن نفسي

في التشجيع

بشجع عكس المتعصب اللي قدامي
وبس

بس نحاسب على وقتنا

يا مراكبي said...

أحلى حاجة في البوست هو موضوع أسبانيا

أنا كنت لاعب كرة قدم سيء جدا جدا على فكرة لكن بأشجع الأهلي ومصر وعارف إيه الدوافع النفسية اللي بتخليني أنا واللي زيي نتمسك بالموضوع ده

الحاجة إلى الإنتماء لشيء .. التفريغ النفسي .. الكبت السياسي .. إلخ

يعني الموضوع مش بسيط كما يبدو

غمض عينيك said...

انت عارف والله اكنك بتحكي عني...انا كمان من صغري مابعرفش العب كورة ودايما اقف جون وكنت بسيب الكره تعدي علطول احس مايحصلي نا حاجة لغايه ماهجرت الكورة وبعد فتره رجعت تاني اهتم بالماتشات المهمة وبتفرج عليها... بس الفرق بقه ان اخواتي مش مهتمين بالكرة لأ دول كمان مهتمين باللعيبة الاوروبيين وده راح فين ودا اتباع لمين وجاب كام جون وكده يعني...اما الست الوالده فهي اهلاوية متعصبة جدا جدا وماتشات الاهلي ممكن ترفعلها الضغط وممكن تنزله لكن الحمد لله بقالها ماتشين الضغط عندها تمام

طولت عليك معلش المره دي

تحياتي
محمد سمير

اه يا دماغى said...

احلى حاجة بصراحة

انا مليش فى الكورة

بس بشجع لو مصر بتلغب مع فريق دولى


خالص تحياتى

Anonymous said...

انا مش متابع الكره زيك ,لكن احيانا لما تكون مصر بتلعب اكيد بتابع لان ده مش مباراه محليه لا دي بتمثل مصر .بس كوني مش بتابع كتير مبارات ده مش معناه اني مش بعرف العب انا بلعب كويس ,
نيجي بقي لخلافي معك ,العيب مش في الكوره عادي الامم المتقدمه شعبها مهووس بالكروه لكن شعبها متحضر ومثقف وواعي ,اذا العيب فينا احنا ,بالعكس الرياضه مهمه جدا بس ياريت نهتم كمان بشغلنا وباشياء اخري كتيره تفيدنا وتفيد مصر

ياسر سليم said...

احب اتأسف للجميع على تأخرى فى الرد

كنت مشغول الفترة اللى فاتت دى

وكنت يادوب بقرأ التعليقات واخرج علطول وممكن ادخل بسرعة أقرأ بوست لأحد المدونين وامشى

ياسر سليم said...

the manager

اسعدنى كما يسعدك ان تعليقك اول تعليق

ومش انته لوحدك اللى كنت مخنوق امبارح

بس .. أنا ساعتها كنت قافل على نفسى وبتصفح المدونات

وبالنسبة لزجلك معانية حلوة
بس الأوزان عايزة تتظبط شوية

وتحياتى على الروح الأدبية
اللى بتطلع اللى جواها فى ابيات زجلية :)

ياسر سليم said...

اخى العزيز : عازف الناى

اذا انا جيت على نفسى وما اعترضتش على متابعة الماتشات .. فأنا عمرى ما أوافق على الهيافات اللى بتحصل بعد الماتشات والمسيرات اللى ما لهاش اى لازمه .. ومش بس كده ممكن شباب يفضل يومين ورا بعض لسه بيتكلموا فى الماتش وده عمل ايه وده سوى ايه ..

ياسر سليم said...

عين ضيقة

نورتى المدونة


ومش عايز


اشوف وشك


هنا تانى


سلام

ياسر سليم said...

بالله المستعان

مش انتى لوحدك :)

ياسر سليم said...

نــــور

انا لا أكره الكورة ذاتها

لأن الكورة دى رياضه .. وطبعاً اى رياضه مفيده

لكن انا اكره الهيافه

الهيافه اللى هى عباره عن ان واحد ممكن يسيب كل مشاغله عشان يتفرج على ماتش

ان الواحد ممكن يسيب كل الكلام اللى يفيد وليه جدوى ويتكلم فى اللعيبه وده بكام وده عمل ايه

ان الشباب بعد ما الماتش يخلص تلاقيهم طلعوا وعملوا زفه

حجااااااااااات كتيره هيافه بتيجى من ورا الكوره

ياسر سليم said...

حراس الحقيقة

انتى وجهة نظرك كويسة وفيها شىء من الصحة

بس انا زى ما قلت قبل كده فى كام رد على كام تعليق

انى لا أكره الكورة لذاتها
لكن

الهيافه اللى انا قصدتها فى البوست
خروج الشباب فى الشوارع
وكمان
لما ندخل اوضه شاب تلاقيه مالى حيطان الاوضه صور لعيبه

ولما ييجى يتكلم مع اى حد ما يعرفش يتكلم إلا فى الكوره
ما عندهوش خلفيه عن اى حاجه تانيه

لو قعدت اقول صور الهيافه من هنا لبكرة مش هنخلص

ياسر سليم said...

همسة قلم

ايوه انا المعنى وصلنى

ولو حضرتك قريتى ردى على التعليقات السابقه

هتلاقى انى بقول نفس الكلام اللى حضرتك بتقوليه

انا لو لقيت ابنى عايز يلعب كوره هشجعه
لكن يتابع ماتش عمرى ما اشجعه
لاء .. فى وقت متابعه الماتشات دى ممكن يعمل حاجه مفيده

لو كل شاب من الشباب المتحمس للكوره والمتعصب ليها .. جمع عدد ساعات عمره ادام متابعه الماتشات هيلاقيها كان ممكن ياخد فيها ماجيستير او دكتوراه

ياسر سليم said...

عمرو غريب

بصراحة

انته اخر واحد انا كنت متوقع انه يرد على البوست ده

ولو رديت عمر ما ده يكون ردك

اشكرك على الشجاعة الأدبية .. وعدم التعصب لفكرة

ياسر سليم said...

مذكرات طالب إخوانى

عندك حق يا معلم حسين

كلامك سليم

الهيافة سبب كل تخلف احنا فيه

ربنا يهدى المسلمين

وانته عامل ايه دلوقتى

ياسر سليم said...

just-amuslim

ما فهمتش قصدك

ان عجبتك نبرة السخرية
بس مش دايما تبقى مفيدة ..

!!!؟

وبالنسبة لرأى همسة قلم فأنا رديت عليه ممكن تشوفى ردى

ويارب ما تكون اخر زيارة

ياسر سليم said...

yasmina

تعليقك هنا دئما يسعدنى

ومن ناحية انى بكره الكوره فمش انا لوحدى

ما تقلقيش

فى كتييييييير ما لهومش فيها

ياسر سليم said...

ابن ناصر

سعدت كثيراً عندما وجدتك معلقاً

ومش عارف بقه فعلا الحياة زى كرة القدم زى ما بتقول ولا ايه

يعنى انا لما كنت بلعب كوره كنت بقف جون

يبقى فى الحياة ايه ؟

ياسر سليم said...

رينــا

ايه انتى كنتى بتضربى فرامل ولا ايه ؟

وباين عليكى انتى اللى كنتى داخله فى حارة سد :)

ياسر سليم said...

إنسانة

هههههههههههههههههه

عجبنى قوى كلام محمد صبحى

ويارتنا الألعاب هى كمان ناجحين فيها

احنا اخر مرة دخلنا كاس العالم امتى ؟

وبنعمل ايه ديما فى الاولمبياد ؟

مصر للأسف وصلت لمرحلة فشل فى كل المجالات

بالرغم ان مصر فيها عباقرة وناس لو اتحطوا فى اماكن صح
حال البلد هتتغير

لكن ربنا ياخده اللى كانوا السبب

ياسر سليم said...

إنسانة

هههههههههههههههههه

عجبنى قوى كلام محمد صبحى

ويارتنا الألعاب هى كمان ناجحين فيها

احنا اخر مرة دخلنا كاس العالم امتى ؟

وبنعمل ايه ديما فى الاولمبياد ؟

مصر للأسف وصلت لمرحلة فشل فى كل المجالات

بالرغم ان مصر فيها عباقرة وناس لو اتحطوا فى اماكن صح
حال البلد هتتغير

لكن ربنا ياخد اللى كانوا السبب

ياسر سليم said...

عابر سبيل

عندما اجد تعليقك .. وكأنى وجدت طفلى التائة

وكأن البوست بينزل عشان تعلق عليه

اما بالنسبة انك زمالكاوى فأنا زى ما قلت فى البوست ان الزمالكاويه مخلصين

الفريق يتغلب وهما لسه زمالكاويه

اما بالنسبة للبوست اللى عايزنى انزله ده .. فلما نشوف ايه اللى هيحصل فى 7 / 7 / 2007
عشان واد من ولاد الراهب قالى انه هيبقى يوم القيامة .. مع اننا لسه ما شفناش المسيخ الدجال ولا سيدنا عيسى

اما بالنسبة لكلماتك .. فانته كل يوم تثبتلى ان المدونات محتاجه عابر سبيل .. مع ان ما فيش التزام بالوزن خالص .. بس يمكن لما تفتح المدونة حالك يتعدل

يلا سلام بقه كفايه كده ونبقى نتكلم واحنا مع بعض

ياسر سليم said...

عصفور المدينة

ههههههههههههههههههههههه

ما تعرفش انا ضحكت اد ايه لما قريت التعليق بتاعك

وباين عليا لما ربنا يرزقنى بعيال هعمل زيك

زيارتك كانت نور للمدونة

ويارب تتكرر علطول وتعليقك ينور كل بوست

ياسر سليم said...

ولـــــو

مين اللى قالك انى ما جبتش جون وانا صغير

اكيد طبعاً جبت جون واتنين وتلاته وممكن اكتر

انا كنت انتهز فتره الراحة فى اللعب وامارس هوايتى المفضله

ادخل اجوان وما حدش بيلعب قدامى

ياسر سليم said...

gohayna

ههههههههههههههههههه

احسن حاجة

اصل انا شوفت بنات كتير بتشجع زى الصبيان كده بالظبط .. ويتكلموا عن اللعيبه

وحاجة تشل

ياسر سليم said...

دكتور حر

حلوه حكاية ان بتشجع عكس المتعصب

انا المكان اللى فيه الكورة ما تلاقينيش فيه

مع انى مقتنع ان الكوره رياضه مفيده

لكن ممكن اشجع غيرى انه يلعبها
لكن عمرى ما العبها

لكن فى مسأله المتابعه
لا انا اتابعها ولا اشجع غيرى انه يتابعها

ياسر سليم said...

يا مراكبى

كلامك فيه جزء كبير من الصحة

ومن خلال التعليقات لاحظت ان ظاهرة عدم حب المدونين للكرة

يعنى الحمد لله مش انا لوحدى

ياسر سليم said...

غمض عينيك

محمد سمير

ههههههههههههههههههههههههه

تعليقك ده زى العسل

يعنى انته عايش وسط مشجيعن كوره محليه وعالمية

بس اكيد وانتوا صغيرين كانت والدتك بتجيبلك كل هدومك حمرا

هههههههههههه

ربنا يخليهالك

ياسر سليم said...

اه يا دماغى

حاولى برضه ما تتفرجيش على الماتش

شجعى من بعيد لبعيد

ههههههههههههه

تحياتى

ياسر سليم said...

wahed

انا معاك فى كلامك

وكلامك سليم

ولو بصيت على ردى على التعليقات هتلاقى انى قلت انى ما بهاجمش الكورة فى حد ذاتها ولكن بهاجم تصرفات شباب مصر ورد افعالهم على الماتش

تحياتى ليك

ويارب ما تكون اخر زياره ليك وتنور ديما المدونة

Anonymous said...

اه هو أنا مع رأي بعض اللي علقوا
ان متابعة كرة القدم عمرها ما كانت هيافة
أنا ما بلعب أصلا
ولا بحب أنزل الملعب
ولا بحب الرياضة كلها على بعضها
لكن بتفرج على الرياضة بأنواعها
وصراحة بستمتع
على الأقل هي أفضل مليون مرة من 90% من المسلسلات والأفلام المعروضة
وأفضل من نص البرامج اللي لا معنى لها
طبعا هذا لا يعني التشدد والتعصب والهبل اللي بنشوفه من مسيرات السيارات والأعلام وصافرات الإنذار وإطلاق نار للتعبير عن الفرح أو الحزن لنتيجة المباراة
يعني شيء جميل متابعة الرياضة بالعقل
مع التقدير لرأيك وفكرتك

Aml Ghonaim said...

انقطعت أنا عن التدوين فى الفترة التى بدأت فيها تدويناتك ....
مدونتك تستحق القراءة فعلا ...
باركك الله ؛
وجعلها فى موازين حسناتك ...
ولا حرمك أجر الدلالة على الخير......
بالنسبة للكورة ؛ فخاتمتك تغنى عن أى تعليق ........

جمعاوى said...

الأخ ياسر

قريت البوست

جااامد أوى

و بالذات لإنى انا كمان مبأحبش الكورة خالص

و جميل أوى الربط

بس قولى إشمعنى أسبانيا ؟

mazagat said...

حالك قريب جدا من حالي يا ياسر


بس عارف ايه الفرق ؟؟



ان الكورة مجتش في وشي وانا صغير ونمل

لا الحمد لله


كانت سليمة

بوست رائع

tota said...

اعتبرها فش غل او ناس بتدور علي حاجه تتحجج بيها عشان تفرح او تسعد او تتلهي او تنسي
حاجه تخرج بيها من دوامه الحياه والبؤس اللي هما فيه
------------------------
مدونتك جميله ياياسر واول زياره ليك وانشاء الله مش هتكون الاخيره
سلامي ليك

هوندا said...

ههههههههههههههههه الله اكبر امنية حياتى اتحققت وشفت راجل مش مهتم بالكورة تمااااااااام مصر بخير الحمدلله

barbie girl said...

مش بحب الكورة

Anonymous said...

والله فيه كره برضه كويسة الواحد بيحب يتفرج عليها بس مش فى مصر طبعا
بس عندك حق الهيافة فى كل حاجة والاستهتار واهم حاجة نقص الدين هما اللى ضيعوا مننا الاندلس

ياسر سليم said...

اخى الكريم بهاء

انا اختلف معاك فى انك تقارن المسلسلات والبرامج بالماتشات

لأن اكيد الماتشات هى اللى تفوز

ولكن مش معنى ان الماتشات هى اللى تفوز انى اتفرج عليها

لاء طبعاً .. ما انا ادامى حجات كتيره تانية مفيده ممكن تتعمل

الواجبات اكثر من الأوقات

ياسر سليم said...

اصرار أمل

اسعدنى جداً مرورك وتعليقك بهذه الكلمات التى اود ان كون مستحقاً لها

ويارب يتقبل دعائك

تحياتى اختى الكريمة

ياسر سليم said...

جمعاوى روش طحن


سؤال جميل .. بتاع اشمعنى اسبانيا

لأنك لو تعرف قصة ضياع اسبانيا كنت عرفت وما سألتش السؤال ده

كانت اوربا كل شويه تبعت ناس يشوفوا الشباب بيتكلموا فى ايه

وكانت طبعاً اسمها الأندلس

فكانت تلاقى الشباب عمال بيتكلم فى العلوم المختلفه ويتبادلوا آرائم
فيرجعوا يقولوا لسه مش دلوقتى
مش هندخل دلوقتى
وفضلوا على هذا الحال إلى انهم جاءوا فى مره فلقوا شاب عمال بيعيط
فسألوه انته بتعيط ليه ؟
قالهم حبيبتى هجرتنى

رجعوا لبلادهم وقالوا ممكن ندخل دلوقتى

ومن بعدها الأندلس بقت اسبانيا

بالهيافه

ياسر سليم said...

اخى العزيز

مزاجات

اهم حاجه انك ما بتحبش الكورة

عشان ما تجيش فى يوم وتقولى انا رايح اتابع ماتش

وكويس انها جت على اد كده

ياسر سليم said...

tota

هو فعلاً كلامك ممكن يكون فى جزء كبير من الصحة

الناس بتدور على اى حاجة عشان تنسى

مرورك اسعدنى كثيرا

ويارب ديما اكون عند حسن الظن

ياسر سليم said...

honda

هههههههههههههههههههههه

بس هى دى كانت امنيتك فى الحياة

ادينى حققتهالك اهوه

هاتى نص جنية بقه

ياسر سليم said...

barbie girl


وانا كمان

ياسر سليم said...

hend

كلامك سليم

واسعدنى جداً تعليقك ومرورك

وأرجوا ان تتكرر الزيارة

تحياتى

Anonymous said...

الاخ الكريم ياسر

جميل جداً هذه التدوينه
جزاكم الله خيراً وجعلها فى ميزان حسناتك

جهاد خالد said...

تدوينة جميلة
عجبني الربط في الاخر

انا اعرف واحد
يعرف تفاصيل ماتشات اتلعبت قبل ما هو يتولد اصلا
!!!!!!!!!!!!!

والله بتعجب منه
عبلارة عن سجل كروي متحرك
وبصراحة ده مش رياضة خااااااااااالص
انا بالنسبة ليا
الساعة ونص بتوع الماتش يروح يلعبهم في نادي احسن

دعواتكم ان ربنا يهديه
:)

والسلام عليكم

mariam said...

احسن حاجه انك مش ليك فى الكوره

المشكله ان الناس عندنا مش بتشجع بعقل
لأ بتعصب شديد
و كل واحد مش بيسمح حد يقول كلمه على النادى اللى بيشجعه
يعنى ليه ميكونش التشجيع بعقل
و لما الماتش يخلص خلاص
لكن ده الكلام عن الكوره ليل و نهار
فى ماتش او مفيش
حاجه غريبه

تحياتى

ياسر سليم said...

د / عاصم

ربنا يكرمك

ويارب ديماً تبسطنى بتعليقاتك

ياسر سليم said...

النجمة الصامدة

ده الشخص ده حالتة صعبة كده

وانا دعوتى لوحدها مش هتنفع

عايز كام ايد معايا تترفع :)

ياسر سليم said...

مريم

دى حاجه تحرق الدم

وكأن كل المشاكل اتحلت وما اتبقاش إلا الكورة

تلاقى الشاب من دول فى البيت يتفرج على ما تشات و فى الشارع اى حد ياقبله يكلمه عن الماتشات

وهو نايم يحلم بلعيب كورة